OURENSE

IVAN PRIETO PRESENTA NO CENTRO CULTURAL O LADO “MÁIS ESTRAÑO” DA ESCULTURA

O xove escultor Iván Prieto (O Barco de Valdeorras, 1978) presentou hoxe no Centro Cultural da Deputación de Ourense o catálogo e a exposición que se inaugura esta tarde neste recinto expositivo. Trátase dunha mostra que recolle 10 anos de traballo do escultor quen define a súa obra como “a busca do lado máis estraño da escultura”.

Infogauda / Ourense

Iván Prieto traballa con personaxes fóra do común, apaixoándose por temáticas como o mundo do circo, as bailarinas ou as modelos “pero sempre procurando deixar unha incógnita para que sexa o espectador quen interprete finalmente a obra”, explica.Nas mans de Iván Prieto mestúranse diferentes técnicas e materiais, que van dende o poliéster á fibra de vidro pasando polo uso da madeira para os complementos, para conformar obras de gran formato como as que require o espazo expositivo do Centro Cultural. O escultor agradeceu especialmente “a permanente colaboración” do Centro Cultural e o magnífico resultado do catálogo, “por si mesmo unha obra de edición e deseño, que contribúe a motivar e ilusionar aos xóvenes creadores que tentamos abrirnos camiño no mundo do arte”, afirmou Iván Prieto.Pola súa banda, o director do Centro Cultural, Francisco González, dixo no acto de presentación que a traxectoria de Iván Prieto “seguímola con moito interese dende que obras súas foron seleccionadas na 1ª Edición do Certame de Artes Plásticas, e a partires de aí foi evolucionando co paso dos anos ata conseguir un estilo singular e moi característico, algo moi difícil de lograr por calquera artista e moito máis cando se trata de escultores xóvenes”. Francisco González definiu a obra de Prieto como: “O belo é feo e o feo é belo”, frase que Mercedes Rozas utiliza para titular o artigo de colaboración que inclúe o catálogo, e explicou que detrás de cada escultura de Iván Prieto “hai un traballo de formación, estudio e preparación no que nada se deixa á improvisación”.Iván Prieto é licenciado e Belas Artes pola Universidade Complutense de Madrid. Entre 1997 e 2010 fixo 16 exposicións individuais e máis de 50 exposicións colectivas, que o levaron a expoñer a súa obra por toda Galicia, Madrid, Huesca, Segovia, Zaragoza, León, Girona, París, Utrech (Holanda) e Mirano (Italia). Ten acadado numerosos premios entre os que destacan o “Galiza Crea” (2007), Premio Adquisición da Deputación de Segovia, terceiro premio no XV Certame Galego de Artes Plásticas (2002), e o segundo premio no Concurso de Pintura e Escultura da Facultade de Belas Artes de Madrid (2002), entre outros.

A mostra inaugúrase esta tarde e poderá visitarse ate o 4 de abril.