OURENSE

PURIFICACIÓN GARCÍA, NO CENTRO CULTURAL DA DEPUTACIÓN

Desde o xoves 5 de Novembro e ata o domingo 13 de Decembro, poderase visitar no Centro Cultural da Deputación de Ourense (Edificio Simeón, C/ Progreso, 32) a exposición das obras seleccionadas do Concurso de Fotografía Purificación García 2009. A inauguración da mostra terá lugar o propio xoves ás 20.15 horas e contará coa presenza da deseñadora. Carlos Irijalba, Carlos Sanva e Mónica Fuster foron os ganadores dos premios da VII Edición do Concurso de Fotografía Purifica ción García.

Infogauda / Ourense

O pasado mes de marzo falláronse os premios da VII Edición do Concurso de Fotografía Purificación García. O Xurado desta edición estaba composto por Rafael Doctor, Marta Gili (Directora do Museo Jeu de Paume), Chema Madoz (Premio Nacional de Fotografía), Oliva María Louro (Directora de Exposicións da Fábrica e comisaria independente), Alejandro Castellote (Critico e comisario independente de fotografía) e un representante da empresa Purificación García. O Xurado realizou unha selección de 27 obras entre as 454 obras presentadas por artistas residentes en España e Portugal. Tras un intenso debate o xurado outorgou os tres premios: un primeiro premio dotado con 12.000 euros a Carlos Irijalba pola súa obra Twilight 14, un segundo premio de 10.000 euros a Carlos Sanva pola súa obra 13 Mil Millóns e un terceiro premio de 8.000 euros a Mónica Fuster pola súa obra Sen Título. O nivel das obras presentadas fixo que o xurado decidise outorgar ademais catro menciones especiais, sen dotación económica a Llorenç Ugas pola súa obra Porta de Luz II, Pedro Pena pola súa obra Rio *Tinto I, Juan Mejías pola súa obra Ceo VIN e Pablo Tarszenski pola súa obra New Earth’s Crust #1 / Sahara Desert, Argelia. A obra Twilight, 14 de Carlos Irijalba, forma parte do seu proxecto Twilight (Un disparo na escuridade) que se levou a cabo na Selva de Iratí, na comarca de Baztán, unha das últimas selvas virxes de Europa. O seu traballo afonda na idea da descontextualización e crea un choque voluntario entre dous ámbitos, o humano e o natural. O traslado e instalación dun foco idéntico ao empregado nos estadios de fútbol na selva de Iratí, un lugar cun escaso índice de contaminación luminosa, xera un brutal contraste que afasta da remota paisaxe calquera atisbo de intimidade, creando unha atmosfera espectral. Con esta acción, xera unha amalgama de contrates: a cultura occidental, que reconstrúe a realidade a través da luz choca coa concepción oriental, que é moito máis consciente das sombras; por outra banda a luz que noutro momento iluminaba o verde do campo de fútbol, cheo de xente expectante, ilumina agora a solitaria e remota selva. Así, a atención desprázase do habitual escenario iluminado, ao artefacto que emana a luz, que queda habitualmente fóra da nosa mirada. Atopámosnos pois cunha clara crítica á sociedade do espectáculo: o insignificante, o ruído do espectacular e o conformismo xeneralizado que dominan a escena da cultura contemporánea. En 13 Mil Millóns, Carlos Sanva profunda na definición dos lugares compartidos e a personalidade dun grupo na *adolescencia. Na fotografía premiada, realizada en China, retrata a un grupo de mozos cunha serie de atributos que parecen diferenciarlles da masa (as súas skates, a bicicleta), pero, máis aló dos elementos materiais, é sobre todo a súa actitude inconformista e a unión do grupo o que lles une fronte ao que lles rodea, unha poboación estimada de mil trescentos millóns de persoas. Sanva afonda no seu retrato no grupo e os subgrupos, na suma de individuos e os trazos individuais que diferencian a uns dos outros. A súa mecánica profunda en tres niveles: en primeiro lugar identifica ao grupo fronte a un total, a continuación céntrase no conxunto en concreto e para rematar evidencia as relacións entre os elementos individuais. Mónica Fuster obtivo o terceiro premio cunha obra profundamente poética na que parte da realidade para transportarnos a un lugar imaxinario, suspendido no tempo, onde parece ocorrer un acontecemento. Da unión de dúas imaxes relacionadas coa luz, xorde unha imaxe nova e con ela o atisbo dunha realidade paralela, próxima ao subconsciente e o onírico. Fuster consegue así desprazar a nosa mirada desde a realidade a unha ficción entre a metafísica e a poética. Dun tempo para acó, Mónica Fuster investiga en como expandir o debuxo ao espazo mediante a luz e como restar peso á escultura, xogando coa ingravidez e a suspensión. A fraxilidade e a transparencia, a ingravidez e o efémero conflúen nun estado de cambio substancial e metamorfose que se reflicte neste delicado traballo. Os premios entregáronse o pasado 2 de abril, coincidindo coa inauguración da exposición das obras seleccionadas no Círculo de Belas Artes. A exposición puidose visitar en Xixón, no marco do Salón de Fotografía Cajastur 2009, para finalizar en Ourense, onde formará parte da programación do Outono Fotográfico.

LISTA COMPLETA DE SELECCIONADOS

Paula Anta, José Luís Beneyto Dáger, Karmelo Bermejo, Massimo Boldrin, Félix Carpio, Carlos Cid, Albert Corbí Llorens, Gerardo Custance, Elena da Rúa, Cecilia de Val, Juan Fabuel, José Ferrero, Jean Fleche, Mónica Fuster, Carlos Irijalba, Juan Mejías Barreira, Roberto Milán, Nave&Millás, Pedro Pena Gil, Juan Pérez Guarner, Gonzalo Pérez Mata, Francisco Reina, Carlos Sanva, Daniel Silvo, Pablo Tarszenski, Zoé T. Vizcaíno, Llorenç Ugas Dubreuil.