DEPORTES

O Rosal, sobre as dúas rodas no XXVI Trofeo Montes das Eiras de Ciclocrós  

Máis de 200 ciclistas de Galicia e Portugal rodarán este sábado 9 polos viñedos da adega Terras Gauda nunha proba única en Galicia  

 

Presentación do XXVI Trofeo Montes das Eiras  de Ciclocrós, na adega Terras Gauda

Foto: C.O.R.

 

Infogauda / O Rosal

 A emoción e a adrenalina do ciclocrós chegan un ano máis ao Rosal. O XXVI Trofeo Montes das Eiras celebrarase este sábado 9 de novembro con máis de 200 participantes de Galicia e Portugal que percorrerán un emblemático circuíto que atravesa os viñedos da adega Terras Gauda, converténdoa na única proba ciclista galega que se celebra nun escenario tan singular. A carreira, organizada polo Club Ciclista O Rosal, conta coa colaboración do Concello.   

 A alcaldesa, Ánxela Fernández Callís, salientou que “o Trofeo Montes das Eiras é unha cita especial para O Rosal e un exemplo de como manter viva unha tradición deportiva que leva 26 anos crecendo e mellorando”. A rexedora felicitou ao Club Ciclista O Rosal por ese compromiso e por ofrecer un evento único que atrae cada ano a máis participantes e público. 

 Pola súa banda, o concelleiro de Deportes, José Carlos Martínez Crespo, tamén subliñou a particularidade desta carreira e a súa conexión co territorio, xa que “o circuíto a través dos viñedos non só proporciona un reto especial para todas e todos os corredores, senón que tamén reforza a identidade do Rosal ao vincular deporte e viño, un dos nosos grandes sinais de identidade”. No acto de presentación da proba participaron ademais da rexedora e o concelleiro, representantes do club ciclista, da adega Terras Gauda e da Federación Galega de Ciclismo.  

 A partir das 11.00 horas, ciclistas de diferentes categorías tomarán o circuíto, reunindo competidores dende os 12 anos ata os maiores de 60. Grazas ás características do terreo, o público poderá desfrutar de toda a carreira desde varios puntos de observación. A organización prevé un ambiente animado e seguro para todas e todos, cun dispositivo de voluntariado de Protección Civil que velará polo bo desenvolvemento da proba. 

 O Concello do Rosal quere agradecer ao Club Ciclista O Rosal, que un ano máis permite desfrutar dunha competición única en Galicia, así como a colaboración e implicación da adega Terras Gauda, da Comunidade de Montes Veciñais en Man Común de As Eiras, da Federación Galega de Ciclismo, da Xunta de Galicia e de todas as entidades e empresas patrocinadoras.