MADRID

O Goberno declara 176 territorios de catorce comunidades autónomas como zonas afectadas por emerxencias de protección 

• Estas 176 emerxencias producíronse entre o 27 de febreiro e o 14 de setembro pasados en comarcas das comunidades autónomas de Andalucía, Aragón, Canarias, Castela-A Mancha,  Castela e León, Cataluña, Comunidad de Madrid, Comunidade Foral de Navarra, Comunitat Valenciana, Estremadura, Galicia, Illes Balears, A Rioxa e Región de Murcia   

• A declaración habilita aos damnificados por estes episodios para solicitar as axudas previstas na Lei 17/2015, do 9 de xullo, do Sistema Nacional de Protección Civil, que son subsidiarias e complementarias ás iniciativas que, no exercicio das súas competencias, adopten as administracións autonómicas  

Infogauda / Madrid 

 O Consello de Ministros aprobou na súa reunión deste martes a declaración de 176 territorios de catorce comunidades autónomas como zonas gravemente afectadas por emerxencias de protección civil de todo tipo, o que permite aos damnificados por estes episodios reclamar as axudas previstas na Lei 17/2015, do 9 de xullo, do Sistema Nacional de Protección Civil.  

 Estas 176 emerxencias producíronse entre o 27 de febreiro e o 14 de setembro pasados e afectaron a distintas zonas e comarcas das comunidades autónomas de Andalucía, Aragón, Canarias, Castela-A Mancha,  Castela e León, Cataluña, Comunidad de Madrid, Comunidade Foral de Navarra, Comunitat Valenciana, Estremadura, Galicia, Illes Balears, A Rioxa e Región de Murcia. 

 Entre estes episodios destaca a depresión illada en niveis altos (DANA) que provocou fortes choivas e tormentas a mediados de agosto en Illes Balears, orixe de inundacións, afeccións a estradas, evacuacións e atrasos en servizos ferroviarios. A situación foi tan grave que se activou unha situación operativa 2 e foi necesaria a intervención da Unidade Militar de Emerxencias. 

 Tamén son relevantes as consecuencias das fortes precipitacións, ventos e fenómenos costeiros adversos que se produciron os últimos días de febreiro como consecuencia dun temporal que afectou de maneira especial a Burgos, Illes Balears, Navarra, A Rioxa e Zaragoza, con precipitacións que causaron inundacións en zonas próximas a ríos, desprendementos e cortes de estradas.  

 Respecto dos incendios forestais, entre o 27 de febreiro e o 14 de setembro son numerosos os rexistrados, que afectaron a gran parte do territorio nacional con consecuencias de diversa consideración, entre as que destacan evacuacións, cortes de servizos e confinamentos de poboación. 

 O real decreto aprobado este martes polo Goberno inclúe tamén varios sucesos asociados ao transporte de mercadorías perigosas por verteduras ocasionadas tras accidentes, así como catro incendios que afectaron a instalacións industriais; tres episodios de contaminación marítima por verteduras no porto das Palmas (Canarias) e Praia do Saler (Valencia); un incendio que afectou a unha empresa de produtos hortícolas en Tomiño (Pontevedra), que obrigou a activar un protocolo de emerxencia por risco químico, e unha alerta por altas temperaturas, na Comunidad de Madrid. 

 Estas 176 emerxencias de protección civil causaron danos persoais e estragos de distinta consideración en infraestruturas, bens públicos e privados e servizos públicos, o que xustifica a intervención da Administración Xeral do Estado, que se apoia no principio de solidariedade interterritorial e que ten sempre carácter subsidiario, complemento das actuacións que, en exercicio das súas competencias, son responsabilidade das comunidades autónomas.  

Axudas do Ministerio do Interior 

 Das axudas previstas na lei para este tipo de situacións, reguladas no no Real Decreto 307/2005, do 18 de marzo, son competencia do Ministerio do Interior as seguintes:  

- por danos persoais: falecemento ou por incapacidade absoluta e permanente: 18.000 euros. 

- a particulares por destrución ou danos en aveños de primeira necesidade: o custo cun límite de 2.580 euros. 

- por destrución total da vivenda habitual: o custo dos danos, cun máximo de 15.120 euros. 

- por danos á estrutura da vivenda habitual: o 50 por cento dos danos, cun máximo de 10.320 euros. 

- por outros danos na vivenda habitual: o 50 por cento dos danos, cun máximo de 5.160 euros. 

- por danos a elementos comúns dunha comunidade de propietarios: o 50 por cento dos danos, cun máximo de 9.224 euros. 

- a persoas físicas ou xurídicas que levasen a cabo prestacións persoais e de bens: o importe total dos gastos. 

- aos titulares de establecementos industriais, mercantís e de servizos, incluídos os agrarios, marítimo-pesqueiros e turísticos: ata 9.224 euros. 

- a corporacións locais por gastos derivados de actuacións inaprazables: entre o 50 e o 100 por cento segundo os casos. 

- o real decreto tamén prevé a posibilidade de que se aprobe unha exención das taxas do Organismo Autónomo Xefatura Central de Tráfico para o duplicado de permisos de circulación ou condución e para baixas de vehículos sinistrados, así como para a expedición do DNI. 

 A lei habilita a outros ministerios a posibilidade de adoptar distintas medidas para paliar as consecuencias destes episodios adversos, como son a exención na cota do Imposto sobre Bens Inmobles e a redución na cota do Imposto sobre Actividades Económicas; medidas laborais e bonificacións e exencións de cotas de Seguridade Social; axudas ás corporacións locais, así como obras executadas con carácter de emerxencia para reparar os danos causados en infraestruturas de titularidade pública.  

176 emerxencias 

 As emerxencias comunicadas no seu momento ao Centro Nacional de Seguimento e Coordinación de Emerxencias (CENEM) da Dirección Xeral de Protección Civil e Emerxencias do Ministerio do Interior son as seguintes: