Guillerme Vázquez pide o voto para o BNG ás persoas que levan a Galiza no corazón
Nun acto concorrido onde se lembrou a Revolución dos Cravos cantando "Grândola Vila-Morena" cun caravel na man
O candidato ao Congreso dos Deputados, Guillerme Vázquez na súa intervención
Infogauda / A Guarda
O BNG celebrou no día de onte un acto público no Casino da Guarda. Un acto concorrido que se encargou de presentar Beatriz Lomba, responsábel local e candidata nº 2 do BNG, ás vindeiras eleccións municipais.
“Hoxe, con ese espírito do 25 de abril, queremos recuperar a nosa voz en Madrid, queremos voltar a estar. Voltar a qué Galiza non sexa a gran esquecida, a qué as nosas demandas sexan escoitadas e atendidas. Ben sabemos o que pasou nestes 4 anos nos que non tivemos representación”, argumentou Beatriz Lomba.
Anxo Lois Baz, candidato do BNG á Alcaldía da Guarda, asegurou que “votar ao BNG é defender os dereitos sociais, as libertades públicas, a democracia. É garantir que Galiza apareza no debate do Estado, e garantir que ás nosas redeiras, mariscadoras, o noso sector pesqueiro van ser escoitados en Madrid”.
No atril Beatriz Lomba erguendo un caravel vermello, diante dos asistentes ao mitin do BNG
O candidato ao Congreso dos Deputados, Guillerme Vázquez, ten claro que o sistema véndenos 5 candidatos aos que nada lles importa Galiza, que veñen de “paracaidistas” pero que en canto rematan as eleccións desaparecen.
“O BNG é a única garantía de dique de contención contra a extrema dereita, machista, antigalega,... Debemos apoiar ao BNG porque está disputando os escanos contra eles”, comentou Guillerme Vázquez entre os aplausos dun ateigado auditorio.
O candidato ao Congreso dos Deputados, Guillerme Vázquez, con Anxo Lois Baz e Beatriz Lomba cantando "Grândola, vila morena"
O acto do BNG rematou con caraveis vermellos e coreando á cantiga "Grândola, vila morena", de José Afonso "Zeca".
"Grândola, vila morena
Terra da fraternidade
O povo é quem mais ordena
Dentro de ti, ó cidade
Dentro de ti, ó cidade
O povo é quem mais ordena
Terra da fraternidade
Grândola, vila morena (...)"
Ningún comentario:
Publicar un comentario