GALICIA

FÁTIMA IGLESIAS SOLICITARÁ A MEDIO RURAL A APERTURA DUN NOVO PRAZO DE AXUDAS PARA A IDENTIFICACIÓN DOS CABALOS DE MONTE

A deputada do Grupo Popular tamén demandará que, de cara ao vindeiro ano, se faga coincidir a publicación destas subvencións de xeito que coincida coa celebración dos tradicionais curros

·        Iglesias mantivo un encontro, acompañada dos alcaldes de Oia, Baiona, Gondomar e O Rosal, así como da portavoz do PP en Tomiño, con gandeiros da Serra da Groba

Infogauda / Santiago de Compostela 

A deputada do Grupo Popular Fátima Iglesias solicitará á Consellería do Medio Rural e do Mar a apertura dun novo prazo de solicitude de axudas para a identificación de cabalos de monte nas mesmas condicións que a orde de subvencións publicada no presente ano 2012. Así mesmo, Iglesias demandará que esta liña de axudas se publique o vindeiro ano de forma que os prazos de identificación coincidan cos curros que se practican a partir do mes de xuño, principalmente.

Fátima Iglesias reuniuse, xunto cos alcaldes de Oia, Baiona, Gondomar e O Rosal, así como a portavoz do Partido Popular en Tomiño, con gandeiros da Serra da Groba para recordarlles a obrigatoriedade de identificar con microchip aos cabalos de monte. “Amosamos a nosa preocupación pola necesidade de dar cumprimento da normativa nestas comarcas do Baixo Miño e Val Miñor,e polas responsabilidades que este feito podería xerar para os gandeiros de non cumprirse con esta obriga”. Neste senso, a deputada popular sinalou que a non celebración este ano dos tradicionais curros” non devén da aplicación da norma nin da necesidade de que os cabalos conten co microchip.

OBRIGA XERAL DE IDENTIFICACIÓN

A deputada popular explicou que a normativa comunitaria establece a obriga xeral de identificación dos cabalos, coa única excepción posible das poboacións que viven en réxime de liberdade en áreas confinadas. No caso concreto de Galicia, as únicas áreas que cumpren esta condición son as illas da fachada atlántica.

Desde hai tres anos, a Consellería do Medio Rural e do Mar ten liñas de axudas para sufragar o custe da identificación destes cabalos ata un máximo de 40 euros por animal, e que cubriron o 90 por cento do custe da identificación en 2010, o 75 por cento en 2011 e o 60 por cento en 2012.

Fátima Iglesias avanzou aos alcaldes e gandeiros que asistiron á xuntanza que mañá, venres, manterá un encontro co director xeral de Produción Agropecuaria, José Álvarez Robledo, a quen lle exporá a posibilidade, demandada por gran número de gandeiros da comarca miñorana ,de dar curso á publicación dunha segunda orde de axudas en 2012 nas mesmas condicións da que foi publicada a principios de ano, e que cubriu o 60 por cento do custo da identificación dos cabalos.

AXUDAS COINCIDINDO COA CELEBRACIÓN DE CURROS

“Ademais, entendemos, ante a demanda dos propietarios dos animais, que, de cara ao vindeiro ano 2013, a Consellería do Medio Rural e do Mar podería adecuar a publicación desta liña de axudas, de xeito que os prazos de identificación coincidan coa celebración dos tradicionais curros que se practican a partir do mes de xuño”, apuntou a deputada popular.

Por ultimo, Fátima Iglesias apuntou que os contactos mantidos tanto pola súa parte coma pola dos responsables municipais desta área coa Consellería do Medio Rural e do Mar amosaron que este departamento do Goberno galego se atopa na liña “de facilitar a tramitación destas axudas e a atención das demandas dos gandeiros” ao tempo que subliñou que a Consellería que dirixe Rosa Quintana é consciente de que os propietarios dos équidos “están a realizar un gran esforzo por manter o cabalo no monte, tan importante e fundamental nas labores de limpeza, desbroce e prevención dos incendios”.