OURENSE

“MÚSICA DE PEDRA E CANTOS DE PEREGRINACIÓNS”, DO GRUPO MARTÍN CODAX NO CENTRO CULTURAL

O Centro Cultural da Deputación de Ourense acolleu hoxe a presentación e inauguración da exposición “Música de pedra e cantos de peregrinacións”, de Bodegas Martín Códax, así como a presentación do concerto que terá lugar en Ourense a cargo do grupo de música antiga “Martín Códax”.
Este evento, promovido por Bodegas Martín Códax, en colaboración co Centro Cultural da Deputación de Ourense e co Xacobeo Galicia, presenta unha exposición de 17 instrumentos antigos denominada “Música de pedra e cantos de peregrinacións”, que permanecerá aberta no Centro Cultural dende hoxe e ata o vindeiro 18 de novembro, e un concerto de música antiga, na igrexa de San Francisco, a cargo do grupo “Martín Códax”.

O xerente do Xacobeo, Ignacio Santos, dixo na presentación que o Camiño de Santiago “estivo unido dende sempre á música, e esta exposición permitiranos coñecer polo miúdo os instrumentos cos que se interpretaban melodías en Galicia nos séculos XII, XIII e XIV, ademais de achegarnos á nosa lírica medieval”. Pola súa banda, o presidente de Bodegas Martín Códax afirma que esta exposición “é a modesta contribución que dende hai moitos anos levamos facendo á cultura galega, promocionando a un dos seus grandes creadores, e tamén para destacar unha etapa moi importante da nosa historia como foi a época medieval”.

O director do Centro Cultural da Deputación de Ourense, Francisco González, destacou a importancia “de que a iniciativa privada se implique en proxectos culturais, e este é un bo exemplo porque une historia, música, poesía e etnografía, xa que temos unha exposición de instrumentos medievais galegos, unido ao traballo de recuperación dos mesmos, e todo elo rematará cun magnífico concerto de música antiga”.

Finalmente, o director do grupo musical “Martín Códax”, Miguel Ángel López, dixo que o traballo que veñen desenvolvendo dende 1995 pola recuperación de instrumentos e melodías antigas de Galicia “ten moito de investigación e de artesanía á vez, un traballo que é posible grazas á sensibilidade que a empresa Martín Códax ten demostrado pola cultura galega”.

Os instrumentos que integran a exposición foron recuperados a través de antigos pergameos, debuxos e esculturas en pedra das catedrais de Santiago e Ourense. Trátase de violas de arco, zanfonas, arpas e un organistrum.