BAIXO MIÑO

A CIG-ENSINO DESMENTE QUE O CURSO COMEZASE CON NORMALIDADE E PON COMO EXEMPLO O CASO DO BAIXO MIÑO

A CIG-Ensino desmente as declaracións do Conselleiro de Educación quen, na comparecencia de onte no Parlamento, se atreveu a dicir que o curso se iniciara con normalidade.
Hoxe mesmo, a CIG-Ensino ten que denunciar que no CEIP de Randufe de Tui, en que se incrementaron as unidades de infantil de dúas a tres, seguen sen serlle asignado o cuarto profesor de Educación Infantil que lles corresponde, repercutindo esta situación sobre o profesorado do centro, nomeadamente sobre o equipo directivo, que ve incrementado o seu horario por riba do legalmente establecido.
Por isto a CIG-Ensino lémbralle ao Conelleiro que a realidade que pintou onte no Parlamento non é tal. Para a CIG-Ensino estamos ante o peor inicio de curso en moitos anos. No mes de setembro a CIG denunciou as múltiples incidencias deste inicio de curso das que o Conselleiro non tomou nota, pois prefere mirar para outro lado e dedicar o seu tempo á propaganda, unha propaganda destinada a ocultar a ineficacia desta Consellaría e a súa aposta polo ensino privado en detrimento do público.
Onte o Conselleiro falou de normalidade no inicio de curso, ocultando que en Primaria o curso comezou o día 10 de setembro sen que todos os centros contasen coa totalidade do profesorado. No caso do Baixo Miño, varios centros iniciaron o curso sen contar con todo o profesorado, malia ter realizado as peticións en tempo e forma. Así o CPI Suárez Marquier no Rosal, o CEP de Caldelas en Tui, o CRA Mestra Clara Torres de Tui, o CEIP de Refoxos, en Oia, o CEIP Bouza Brei en Ponteareas ou o CEIP Infante Felipe en Salvaterra. Ademais está o caso do profesorado asignado aos centros para atender as necesidades educativas que este ano non foi asignado, así moitas prazas de Audición e Linguaxe.
Hai que lembrar que esta situación súmase aos recortes de unidades realizados este ano e tamén o ano anterior, así no CEIP de Refoxos, ao que se lle suprimiu unha unidade indebidamente o curso pasado, e que malia ser reclamada reiteradamente desde o centro e na Xunta de Persoal, segue sen ser catalogada, a pesar de estar en funcionamento, o que significa que non contan con todo o profesorado que necesitan realmente.
En Secundaria o curso comezou tamén sen que os centros contasen con todo o profesorado, así no IES de Salvaterra ou no IES da Sangriña, mentres a Consellaría outorgaba 19 novos concertos a outras tantas unidades de centros privados, entre eles ao colexio Aloia de Vigo, que segrega o seu alumnado en función do sexo.
A CIG-Ensino esixirá ante a Xefatura Territorial a cobertura de todas as necesidades de profesorado dos centros.