A GUARDA

A OMIX DA GUARDA PRESENTA A SÚA NOVA AXENDA OUTONO/INVERNO 2026 CUNHA AMPLA PROGRAMACIÓN PARA A MOCIDADE   

O alcalde da Guarda, Roberto José Álvarez Carrero e o concelleiro de Facenda, Administración Local, Medioambiente e Biodiversidade, Óscar Alonso Álvarez, na presentación da nova Axenda Outono/Inverno 2026, da OMIX do Concello da Guarda

Foto: CAG

Infogauda/A Guarda 

 A Oficina Municipal de Información Xuvenil (OMIX) do Concello da Guarda presentou hoxe a súa nova Axenda Outono/Inverno 2026, unha programación que busca ofrecer alternativas de lecer, formación e participación para diferentes idades e intereses.  

 En outubro arranca a programación de Tardeo, uns obradoiros que se organizan en colaboración coas asociacións da Guarda. Incluídos neste programa poderemos gozar durante os meses de outubro e novembro das actividades:  

• Billar a tres bandas ou de carambola (3 de outubro, Recreo Artístico Guardés) 

• Customiza as túas zapatillas (10 de outubro, Asociación Érguete Baixo Miño) 

• Porcelana fría (17 de outubro, Asociación Transmiño) 

• Maquillaxe (23 de outubro, Dansá) 

• Flores con lazos de cores (7 de novembro, Asociación Virxe da Guía)  

 A axenda inclúe tamén os obradoiros de álbums de recortes, o 24 de outubro de 10:00 a 13:00 horas, e elaboración de velas, o 28 de novembro no mesmo horario.  

 Para a Infancia están previstas dúas propostas: o campamento Concilia Nadal e un obradoiro de teatro, que terá lugar todos os martes durante o curso escolar, de 16:00 a 17:30 horas, con inscrición aberta durante o mes de outubro.  

 No apartado Xuventude a máis, destinado á mocidade de 16 a 35 anos, ofreceranse obradoiros de adestramento canino, DJ e edición de vídeo e fotografía, cunha duración de 20 horas cada un.  

 Finalmente, a área de Mocidade incorpora a Rede Xove, un grupo de participación xuvenil vinculado ao IES A Sangriña, e o obradoiro de cómic “A violencia do cotián”, que incluirá unha exposición dos traballos realizados.  

 A apertura de inscricións e máis información das actividades irase avisando a través da web e redes do Concello. Ademais, proximamente haberá dispoñibles axendas físicas na OMIX da Guarda para ter a man todas as datas das próximas actividades.