A GUARDA

A ROSEGHA ENCHE DE NOVO O PORTO DA GUARDA DE BARCOS, MEMORIA MARIÑEIRA E ACTIVIDADE INTERXERACIONAL  

• A Asociación Piueiro organiza os días 11 e 12 de xullo a terceira edición dunha cita que reúne modelismo naval, obradoiros, exposicións, charlas, saídas de navegación no volanteiro Piueiro, música tradicional e actividades para todas as idades  

• O encontro conta coa colaboración do Concello da Guarda e da Deputación de Pontevedra e desenvolverase na carpa instalada na explanada do porto, con actividade o sábado pola mañá, tarde e noite, e o domingo pola mañá  

Navegación de maquetas de barcos na carpa do evento

Mar Bermúdez/A Guarda

 Hai barcos que non precisan saír a mar aberto para contar a historia dun pobo. Abonda con velos navegar nunha carpa do porto, feitos a escala, guiados con paciencia e rodeados de xente que entende que detrás de cada casco, cada vela e cada marca mariñeira hai unha maneira de vivir. Esa é a esencia de A Rosegha, que volverá os días 11 e 12 de xullo á Guarda coa súa terceira edición.  

 A Asociación Piueiro promove de novo esta cita cun programa que vai moito máis alá da exhibición de maquetas porque A Rosegha é sinónimo de encontro, aprendizaxe e memoria compartida. Xunta a afeccionados ao modelismo naval, persoas maiores que gardan oficio e lembranza, familias, visitantes, rapazada e veciñanza arredor dun patrimonio marítimo que segue vivo cando se transmite.  

 A programación, baixo o lema "Unindo pobos", combina navegación de maquetas, obradoiros, exposicións, charlas, música tradicional, visitas guiadas e saídas no volanteiro Piueiro, a embarcación recuperada pola asociación. A actividade desenvolverase na carpa situada na explanada do porto e conta coa colaboración do Concello da Guarda e da Deputación de Pontevedra. 

 O sábado 11 de xullo abrirá a terceira edición de A Rosegha ás 10.00 horas, coa chegada ao porto de O Trebón dos Xidos, que iniciará o pasarrúas desde a carpa. A partir dese momento, a explanada portuaria converterase nun espazo de encontro arredor do modelismo naval, das embarcacións tradicionais e da memoria mariñeira. 

 A navegación de maquetas será un dos fíos condutores da xornada. Ao longo do sábado sucederanse quendas dedicadas a barcos de guerra, embarcacións tradicionais de vela, barcos de pesca, barcos de manobra e navegación libre. Tamén haberá espazo para a navegación infantil, na que a rapazada poderá probar os barcos elaborados nos obradoiros ou utilizar maquetas facilitadas pola organización. Xa pola noite, a partir das 00.00 horas, celebrarase a navegación nocturna ata o peche. 

 Os obradoiros permitirán achegarse aos oficios e ás formas máis populares da cultura mariñeira. O sábado ás 11.00 horas celebrarase un taller de návoas, os tradicionais barquiños de cortiza, e pola tarde continuarán as sesións con arxila e novas návoas. O domingo pola mañá manterase esta liña participativa, con obradoiros de arxila e návoas desde as 11.00 horas e unha nova sesión de arxila ás 12.00 horas. As prazas son limitadas e a inscrición deberá realizarse na carpa. 

 A parte divulgativa terá un peso propio dentro do programa. O sábado ás 12.00 horas presentarase o libro "A vela latina guardesa", de Jairo Alonso Lomba, centrado nunha das sinais de identidade náutica da vila. Ás 13.00 horas celebrarase a charla "Os barcos de vapor na Guarda durante o primeiro cuarto do século XX", a cargo de José Antonio Álvarez Rocha. 

 Pola tarde, a actividade trasladarase tamén á rampla do porto, onde ás 16.00 horas terá lugar unha exhibición e regata de veleiros de radiocontrol da clase IOM. Ás 18.00 horas, Xosé Iglesias ofrecerá a charla "O porqué de construír un libro como Nao cetácea". A partir das 19.00 horas poderá verse unha exhibición de construción tradicional de vela e, ás 19.30 horas, sairá unha visita guiada pola Guarda mariñeira, con prazas limitadas e inscrición previa. 

 Ao longo da xornada permanecerán abertas as exposicións de maquetas de embarcacións de diferentes tipoloxías, material marítimo-pesqueiro e marcas mariñeiras. A proposta complétase cunha exhibición de barcos de lata, que incorpora á cita esa parte máis popular, manual e doméstica da relación da vila co mar. 

 O programa inclúe tamén saídas de navegación no volanteiro Piueiro, a embarcación tradicional recuperada pola Asociación Piueiro. As travesías terán unha duración aproximada de 50 minutos e realizaranse o sábado en catro quendas: ás 11.30 e 12.30 horas pola mañá, e ás 17.00 e 18.00 horas pola tarde. A inscrición deberá formalizarse na carpa ata completar prazas. 

 O domingo 12 de xullo, A Rosegha continuará pola mañá con novas navegacións de maquetas, obradoiros e dous momentos especialmente vinculados á tradición local. Ás 12.00 horas chegará á carpa o pasarrúas do Grupo de Gaitas do Clube de Xubilados e Pensionistas da Guarda e, nesa mesma franxa, terá lugar o izado de velas dos antigos gameleiros. A entrega de premios e a clausura están previstas para as 13.00 horas. 

 Con esta terceira edición, A Rosegha reforza o seu carácter de encontro interxeracional arredor do mar. No mesmo espazo convivirán maquetas, embarcacións tradicionais, música, libros, oficios, relatos e navegación. Unha maneira directa, participativa e moi guardesa de manter viva a memoria mariñeira e compartila con quen xa a coñece e con quen a descobre por primeira vez.