TUI

O PP DE TUI DENUNCIA A TEMERIDADE DO ALCALDE POR PEDIR UN PRÉSTAMO MILLONARIO MENTRES REDUCE SEN CONTROL O REMANENTE DE TESOURERÍA 

• O PP de Tui denuncia a nefasta xestión económica do goberno socialista de Enrique Cabaleiro, que pretende endeudar ao Concello en máis de 3,1 millóns de euros para renovar o alumeado público, cando ata hai pouco o municipio presumía de ter débeda cero. 

• Os populares lamenta que o Concello perdera a oportunidade na anterior convocatoria de Subvención do Ministerio de Transición Ecolóxica e concorra á deste ano, que é un Préstamo. 

Grupo municipal do PP de Tui 

Foto: Cedida

Infogauda / Tui

 O grupo municipal do PP de Tui denuncia que “o goberno socialista de Enrique Cabaleiro pretende hipotecar ao Concello cun préstamo do Estado por importe de 3,17 millóns de euros para a renovación do alumeado público. Unha operación que chega logo de esgotar boa parte do remanente de tesourería, que se reduciu de máis de 11 millóns a pouco máis de 3 millóns dispoñibles na actualidade”. 

 “Non lle chega con gastar os aforros dos tudenses, agora tamén nos mete nun préstamo a dez anos que converterá a Tui nun concello endeudado cando até hai pouco presumía de débeda cero. É unha auténtica irresponsabilidade”, advertiu o voceiro popular, Nico Montes. 

 Os populares lembran que “o Concello de Tui foi durante anos exemplo de boa saúde financeira, sen débeda bancaria e con capacidade de investimento grazas ao remanente. Porén, a xestión socialista levou a esgotar eses fondos a base de gasto corrente descontrolado e agora pretende tapar esa falla con novo endebedamento”. 

 O PP lembra que “na anterior convocatoria do programa estatal de renovación do alumeado as axudas eran a fondo perdido. Concellos coma Tomiño ou Salvaterra souberon aproveitar esa ocasión e modernizaron o seu alumeado sen custo ningún para os veciños. En Tui, pola contra, a falta de xestión e dilixencia do alcalde fixo que se perdera esa oportunidade e agora venden como éxito o que en realidade é o maior préstamo concedido en Galicia neste programa”. 

 “É un auténtico disparate: hipotecar o futuro de Tui só para tapar a incapacidade do goberno de xestionar e de captar fondos a fondo perdido, como fixeron outros concellos da comarca. Presentar como un logro recibir a maior achega de Galicia non é un motivo de orgullo, senón a proba da súa falla de xestión: o que realmente fixeron foi endebedar a Tui co préstamo máis elevado de toda Galicia”. 

 Os populares explicaron que “devolver este préstamo a 10 anos, aínda que sexa sen xuros, tradúcese nunha carga media de 317.000 euros anuais, unha auténtica hipoteca” que, segundo o PP, “vai afondar aínda máis na xa delicada situación económica do Concello, que arrastra a devolución de 700.000 euros ao Estado polos incumprimentos nas obras do teatro e que ten aínda pendente a rescisión do contrato do aparcadoiro, entre outros problemas graves”. 

 O PP critica tamén que “esta decisión se tomara sen diálogo cos grupos da oposición, malia gobernar en minoría. Ademais, non se explicou nin se presentou unha auditoría enerxética global que avale o proxecto nin se detallou con claridade cando se amortizará realmente o investimento”. 

 Desde o PP de Tui - conclúe o voceiro popular, Nico Montes -, trasladamos publicamente as nosas inquedanzas: 

 • Por que somos o único concello da provincia que se acolle a este formato de préstamo do IDAE? 

 • Por que pedimos a maior contía de toda Galicia este ano? ¿Será que os demais concellos galegos non cren neste modelo de financiamento? 

 • ¿O equipo de goberno consultou con profesionais especializados para buscar a mellor solución? 

• ¿Existe unha auditoría enerxética global que avale este proxecto? E, se a hai, quen está facendo ese traballo de campo e con que enxeñería se conta? 

• ¿É certo que o custo real de cambiar todo o alumeado que queda pendente en Tui supera os tres millóns de euros? 

• ¿E a pregunta máis importante: cando se fai unha inversión en aforro enerxético, en que prazo se recupera realmente esa inxente inversión e este novo endebedamento? 

 O voceiro do Partido Popular, Nico Montes, subliñou que “o Concello de Tui vive grazas ao remanente de tesourería, que se reduce a pasos axigantados. Pedir agora un préstamo millonario é unha temeridade que hipotecará o futuro económico do municipio. Tui non debe hipotecarse, senón planificar con rigor para garantir servizos de calidade á cidadanía. No PP dicímolo con claridade: non imos apoiar este disparate nin a improvisación constante dun goberno sen proxecto”.