PONTEVEDRA

A Deputación organiza xunto coa UNED un seminario internacional que reúne figuras do pensamento e a creación contemporánea no marco da Bienal de Arte 

•  Rob Riemen, Francesca Ferrando, Ángela Molina Climent e Françoise Vergès intervirán nesta cita aberta ao público que se celebrará do 25 ao 27 de setembro na sede da UNED en Pontevedra 

Pazo da Deputación de Pontevedra

Foto: D.PO.

Infogauda / Pontevedra

 No marco da 32.ª Bienal de Arte de Pontevedra, a Deputación e a UNED presentan o seminario internacional “Volver a ser humanos”, un espazo de reflexión que reunirá figuras destacadas do pensamento, a arte e o mundo académico para analizar o impacto da guerra no presente e o papel da arte, da memoria e do pensamento como elementos de resistencia, sanación e esperanza. O encontro, aberto a todos os públicos, celebrarase os días 25, 26 e 27 de setembro na sede da UNED en Pontevedra, tanto en modalidade presencial como en liña.

 O seminario reunirá recoñecidas personalidades da reflexión e da creación contemporáneas: a crítica de arte e filóloga Ángela Molina Climent; o ensaísta neerlandés e fundador do Nexus Institute Rob Riemen; a teórica política e comisaria Françoise Vergès; o artista e estratega Alberto Barreiro; o crítico de arte e comisario italiano Demetrio Paparoni; a artista, escritora e cineasta palestina Emily Jacir; o fotógrafo israelí fundador da organización Breaking the Silence Miki Kratsman; e a filósofa Francesca Ferrando, especialista en estudos poshumanos e profesora na Universidade de Nova York.  

 A programación do seminario arranca o xoves 25 á tarde coa inauguración e as intervencións de Ángela Molina Climent e Rob Riemen. O venres á mañá terán lugar as conferencias de Alberto Barreiro e Demetrio Paparoni, e á tarde as de Emily Jacir e Miki Kratsman. Concluirá na mañá do sábado, coa participación de Françoise Vergès e Francesca Ferrando. Está dirixido por Sergio Martínez Luna, vicedecano e profesor de Filosofía da UNED, coa codirección de Antón Castro e Agar Ledo Arias, comisario e comisaria adxunta da Bienal, e coa coordinación de Rafael Cotelo Pazos.  

 A asistencia é gratuíta, e require a inscrición a través da web de extensión universitaria da UNED: https://extension.uned.es/actividad/46815&codigo=46815. Está aberta a todo o público e pode elixirse entre asistencia presencia ou asistencia en liña en directo ou en diferido.

Reflexionar sobre a guerra e o humanismo no século XXI  

 O seminario adopta o título da Bienal, “Volver a ser humanos”, para situar no centro da reflexión as guerras actuais que condicionan a vida cotiá de millóns de persoas. A través de conferencias e diálogos, o seminario convidará a reflexionar sobre cuestións esenciais do noso tempo: as responsabilidades que nos corresponden como cidadáns perante os conflitos que atravesan o mundo; o modo no que as migracións forzadas, a pobreza e o desprazamento condicionan a nosa percepción do presente; a capacidade da arte, da palabra e do pensamento para contribuír á reconstrución da esperanza e da paz; así como o sentido de volver a ser humanos na encrucillada contemporánea entre humanismo, poshumanismo e transhumanismo.