MOS

O Concello de Mos inicia a extinción do contrato coa empresa do SAF sen informar o persoal 

•  A representación da CIG solicitara unha reunión cos responsábeis municipais en agosto para abordar os graves incumprimentos laborais de Serveo 

Concentración das traballadoras do Servizo de Axuda no Fogar (SAF) do Concello de Mos

Foto: CIG

Infogauda / Mos 

 A CIG denuncia que as traballadoras do Servizo de Axuda no Fogar (SAF) do Concello de Mos souberon polas redes sociais que o Goberno local vén de iniciar un expediente de extinción do contrato con Serveo, a empresa adxudicataria. Dende a central sindical lembran que o pasado 26 de agosto solicitaran unha xuntanza cos responsábeis municipais para abordar os graves incumprimentos laborais por parte da compañía.  

 Xunto coa solicitude de reunión a CIG rexistrara no Concello unha denuncia interposta diante da Inspección de Traballo por cuestións como a falta dun plan de prevención de riscos e de rexistro de xornada, así como descansos, xornadas irregulares e contratación. 

 Problemáticas que se iniciaron nada máis poñerse en marcha o servizo o pasado 9 de abril, data na que “a organización sumiuse nun auténtico caos, tanto para o persoal como para as persoas usuarias”. Diante disto, a representación legal das traballadoras mantivo varias xuntanzas coa empresa reclamando a normalización da actividade, “pero nun primeiro momento Serveo culpou a anterior adxudicataria do traspaso de información”.  

 Tras catro meses e catro encontros sen acadar acordos básicos como a entrega do documento de subrogación, o recoñecemento das antigüidades ou a consulta dos cuadrantes para comprobar xornadas e horarios, a CIG procedeu a denunciar os feitos diante da autoridade laboral. 

 Neste tempo os responsábeis municipais negáronse sempre a recibir as traballadoras, que solicitaran ser escoitadas antes da elaboración do prego de condicións da actual adxudicación coa intención de que se melloraran as súas condicións e se protexeran fronte os abusos das posíbeis licitadoras.   

 “Non esquezamos que a atención das persoas depende nun 90% do traballo do persoal auxiliar, polo que o servizo so pode mellorarse coidando as traballadoras, escoitando as súas necesidades e poñendo os medios necesarios para garantir a súa protección”, indican desde a CIG. 

 Pola contra, o persoal encargado do servizo segue a ser silenciado polo Concello, que o considera persoal externo a traspasar a empresas intermediarias “cuxa única intención é a facturación de cartos públicos obtendo un beneficio que conseguen a base da precariedade e usurpación de dereitos laborais”. 

 Agora, tras ter coñecemento do inicio dun expediente de extinción do contrato sen ter informado as propias traballadoras a CIG esixe a convocatoria dunha reunión urxente na que se aborde a xestión directa do servizo, se asuman responsabilidades de protección das auxiliares e se lles explique ás traballadoras cal é a súa situación actual e como se van afrontar no inmediato os graves incumprimentos en materia laboral.