TOMIÑO

A I Papanoelada Moteira de Tomiño logrou recoller máis de 200 kilos de alimentos para SOS Tomiño  

• A actividade conseguiu convocar a máis de 300 moteiros e a 600 persoas que asistiron como público 

• Ao final da ruta, houbo chocolate quente de balde para todas as persoas participantes, e caramelos para os nenos e nenas 

  

Vista das persoas participantes na I Papanoelada Moteira de Tomiño, organizada con fins solidarios o pasado domingo

Foto: C.T.

Infogauda / Tomiño  

 A I Papanoelada Moteira de Tomiño, organizada con fins solidarios o pasado domingo, pola Concellería de Mocidade, Lecer e Participación Veciñal en colaboración con As Rutas de Suso, conseguiu recoller uns 200 kilos de alimentos non perecedoiros destinados á SOS Tomiño Baixo Miño para que esta organización sen fins de lucro, poida repartilos, á súa vez, entre as familias que se atopen en situación desfavorecida.  

 Tal como estaba previsto, a saída tivo lugar ás 16.00 horas desde o Polígono de Forcadela e foi percorrendo as parroquias de Forcadela, Goián, Tebra e Tomiño Centro, ao longo duns 30 quilómetros, chegando sobre as 17.30 horas á praza do Seixo.   

 Ao finalizar a ruta, repartiuse, coa colaboración da comparsa Estrelas da Noite, chocolate para todos os participantes, mentres que as persoas que asistiron a ver o evento, puideron mercalo a prezos populares.  

 As máis de 600 persoas que asistiron como público, tiveron que achegar 1 kilo de alimentos para SOS Tomiño Baixo Miño, organización sen fins de lucro, que fará chegar a comida ás familias menos favorecidas. A saída, os/as axudantes de Papá Noel repartiron caramelos para todas as nenas e nenos que asistiron á convocatoria.  

 O concelleiro de Mocidade, Lecer e Participación Veciñal, Agustín González, agradeceu a boa acollida do evento solidario, tanto polos participantes, como pola veciñanza e moi especialmente o labor de Protección Civil de Tomiño, comparsa Estrelas da Noite e As Rutas de Suso.