O ROSAL

O Rosal dálle vida ás viñetas nos seus Obradoiros de Outono cun taller de banda deseñada  

O Concello organiza o 30 de novembro un taller teórico-práctico para mergullarse na linguaxe do cómic dirixido polo ilustrador Xosé Tomás  

Aberto o prazo de inscrición para participar nesta iniciativa dirixida a todos os públicos con prioridade para menores de 30 anos  

 

Infogauda / O Rosal  

 O Rosal leva o poder do debuxo máis alá do papel. O Concello abre o prazo de inscrición para participar nun dos Obradoiros de Outono, un taller teórico-práctico de introdución á banda deseñada da man de Xosé Tomás, ilustrador, humorista gráfico e guionista cunha ampla experiencia.  

 Un percorrido histórico por esta disciplina creativa dende a súa orixe no século XIX ata as técnicas narrativas e estéticas actuais no que as e os participantes poderán aprender e experimentar con recursos como a creación de viñetas, globos e secuencias narrativas, o deseño de personaxes con profundidade física e psicolóxica ou o desenvolvemento de microhistorias. 

 “O cómic é moito máis que debuxar, é unha linguaxe que combina imaxe, palabra e narración para transmitir ideas e emocións dunha maneira única. Con este obradoiro queremos achegar esta arte a todas e todos os rosaleiros que desexen aprender, experimentar e crear”, sinalou o concelleiro de Xuventude, Alejandro González, quen subliñou a importancia de ofrecer actividades formativas innovadoras e de calidade para a mocidade pero tamén para a poboación xeral.  

 Organizado pola Oficina Munipal de Información Xuvenil (OMIX) do Rosal, aínda que o taller está dirixido a público de todas as idades terán prioridade á hora da inscrición as persoas menores de 30 anos. Este primeiro obradoiro celebrarase o sábado 30 de novembro de 10.00 a 13.00 horas na nave obradoiro da Mata e terá un prezo de 10 euros por persoa, con todo o material incluído.  

 Con prazas limitadas, as persoas interesadas poden xa inscribirse a través do formulario web habilitado. Unha vez realizada a inscrición chamarase ás persoas interesadas para confirmar a súa participación e informar sobre o modo de pago. 

 Con esta iniciativa, realizada ao abeiro dos Obradoiros de Outono, o Concello reafirma o seu compromiso coa formación cultural e coa posta en marcha de espazos que fomenten a creatividade entre a veciñanza, especialmente entre os mozos e mozas.