MAR

Armadores, europarlamentarios e sindicatos coinciden en que a normativa europea está a potenciar que a frota chinesa invada os mares  

• O sector denuncia que Bruxelas deixa sistematicamente fóra das subvencións europeas á frota de longa distancia, freando a súa modernización e condenándoa ao despezamento.

• Os límites que impón o regulamento comunitario aos barcos galegos están a dar ás aos chineses, para os que a sustentabilidade ou os dereitos dos traballadores non son ningunha prioridade. 

• Armadores, sindicatos, representantes da Secretaría de Pesca e da Consellería do Mar e europarlamentarios coincidiron en reclamar cambios na normativa “para non seguir pescando en pleno século XXI con barcos do século XX”. 

Autoridades, ponentes e directicos de ORPAGU

Vista dos asistentes as IX Xornadas internacionais de Pesca sobre grandes migradores, organizadas por ORPAGU, e celebradas na Casa dos Alonso

Mar Bermúdez / A Guarda

 “A frota de longa distancia, entre a que se atopa a de Orpagu, pode ter os días contados se non hai un cambio na regulamentación comunitaria que nos permita recibir subvencións para modernizar as nosas embarcacións e facelas máis sostibles, eficientes e atractivas  para os mozos”, sinalaron esta mañá desde Orpagu tanto o seu presidente, Joaquín Cadilla, como a directora xerente, Juana Parada, na inauguración e clausura das Xornadas Internacionais de Pesca que organiza cada ano desde fai nove a Organización de Palangreiros da Guarda.

 Neste sentido, lamentaron que as limitacións de Bruxelas á frota estean a provocar que os barcos chineses aprópiense de todos os mares. Unha frota, destacaron, “que non ten entre as súas prioridades nin a sustentabilidade dos mares, nin os dereitos dos traballadores”.

 Estas reivindicacións do sector do palangre de superficie foron apoiadas polos  representantes das administracións –Francisco de Borja Carmona, da Secretaría de Pesca;  e Antonio Basanta, director xeral de Pesca da Consellería do Mar-, os eurodeputados Nicolás González Casares (PSOE) e Ana Miranda (BNG), e a parlamentaria autonómica Begoña Freire (PP), quen denunciou que se obrigue ao sector galego “a pescar con barcos do século XX en pleno século XXI”.   

 De feito, no discurso de clausura, Juana Parada destacou que si poidan recibir subvencións europeas para “parchear buques que teñen unha idade media de 30 anos” e non “para construír novas unidades destinadas non a pescar máis senón a ser máis sostibles e eficientes”.  Parada pediu un cambio de mentalidade na Comisión Europea porque “agora mesmo xa hai moitos armadores pensando no despezamento e iso é porque algo non se está facendo ben”. 

 A posibilidade, cada vez máis real, de deixar en mans da frota chinesa a soberanía alimentaria europea foi outro dos temas que se trataron nas mesas redondas que congregaron no Concello da Guarda a empresarios, representantes do Goberno de España e da Xunta de Galicia,  aos sindicatos de CCOO e CIG, a especialistas en formación pesqueira como Ramón Otero e Antía Guillén  e  a representantes de empresas de innovación e estaleiros como Gonzalo Redondo, CEO de D3 Applied Technologies; Jorge Luís Sánchez, de Nodosa, ou Javier Martín-Arroyo, de Astilleros Gondán, quen destacou que ao redor do 90% dos barcos que constrúen son para fose de España. 

 Precisamente estes tres últimos  referíronse a proxectos piloto de barcos, “algúns deles xa contratados noutros países, que permiten axuntar eficiencia, coidado do medio e confortabilidade para os traballadores”.  De feito, a reivindicación de “revisar o límite da capacidade de arqueo bruto para mellorar as condicións de vida a bordo, algo que non permite a lexislación comunitaria actual” foi amplamente debatido en varias das mesas redondas organizadas por Orpagu.  

 O Plan Renove para a frota de longa distancia tan demandado polo sector e apoiado por todos os grupos políticos españois con representación en Bruxelas, sen excepción, é a materia pendente para un sector que ve como cada ano perde posibilidades de pesca, carece de tripulantes para poder saír ao mar e recibe o ataque indiscriminado de pseudo ecoloxistas “ante a inacción de Bruxelas”. 

 Como sinalou o director xeral de Pesca galego na clausura do evento, “habémosnos reinventado, somos un sector que pasou de queixarse a propoñer e liderar e, a pesar diso, Bruxelas dános as costas”.