DEPORTES

BALONMAN

División de Honra feminina

Abel González (adestrador do Atlético Guardés): “Estou  moi agradecido ao club por esta confianza”   

José Ignacio Prades e Abel González Colorado

Foto: A.G.

Infogauda / A Guarda

 Como xa informamos na edición de onte deste xornal dixital transfronteirizo, Abel González Colorado será o técnico que relevará a José Ignacio Prades, como adestrador do Atlético Guardés, a farao dende a pretempada próxima. O técnico asturiano resume este paso nunha palabra: agradecemento. “Moi grande, ademais”,  apostila. Abel da as grazas ao club “por esta confianza” por ofrecerlle o cargo de primeiro adestrador. “E, sobre todo, por pensar que o vou a facer ben. Senon, non me propoñerían”, apunta cun  sorriso.   

 Consciente de que  aínda quedan tres partidos para terminar esta tempada e centrado en achegar o máximo posible a José Ignacio Prades e ao equipo para acabar da mellor  maneira, Abel entreabre unha xanela ao curso que vén. “A tempada que vén visualízoa en positivo. Penso que a plantilla que se está confeccionando é competitiva e vai a loitar desde o principio ata a final en todos os partidos”, expresa. “Imos armar un equipo que vai a traballar duro nos adestramentos para poder estar ao nivel  requirido”, apunta sobre o  cadro de persoal que dirixirá a vindeira tempada 2022/2023.  

 “Temos  moitas ganas de facelo ben e tentar,  sempre que se poida e os condicionantes acompañen,  darlle un título a esta afección o unha clasificación acorde a entidade do Atlético Guardés”, agrega.  

“A plantilla que se está confeccionando será  moi competitiva”  

 Abel desfaise en eloxios cara a José  Ignacio  Prades, co que compartiu moitos adestramentos, partidos e experiencias,  ademais dun título de Liga en 2017. “Foi un  luxo contar cun  mestre como el estes anos”, salienta González, que desexa que o seleccionador nacional “tamén aprendese cousas para aplicar no día a día” agora que estará á fronte das Guerreiras en exclusiva. “Creo que  faciamos un bo equipo. É unha mágoa que  teñamos que separar os nosos camiños pero  penso que algún día atoparémonos de volta e  poderemos traballar de novo xuntos”,  desexa.  

 “Evidentemente, relevar a Prades é moita  responsabilidade. Pero teño ganas de facelo  ben sen compararme con el porque cada un ten a súa forma de facer. O que para min é máis importante é dar  continuidade ao  traballo que José desempeñou estes anos, con algún toque ou matiz persoal meu para que isto continúe tal cal  como imos agora”, conclúe o técnico del Atlético Guardés 2022/23.