PONTEVEDRA

CORES TOURÍS LEMBRA QUE ESTÁ ABERTO O PRAZO DE SOLICITUDE DE AXUDAS PARA A POSTA EN MARCHA DE CASAS DO MAIOR NOS CONCELLOS DE PONTEVEDRA DE MENOS DE 5.000 HABITANTES    

· O delegado territorial da Xunta de Galicia en Pontevedra recordou que estes centros estarán destinadas á atención de persoas maiores de 60 anos de idade en situación de dependencia moderada e severa, e atenderán a un máximo de cinco usuarios de xeito flexible e con garantías de seguridade e calidade 

· A convocatoria de axudas estará dotada con 1,3 millóns de euros para 2018 e 2019 e subvencionará tanto a reforma e adaptación da vivenda e o seu equipamento e dotación material como a atención profesional prestada 

· O prazo de presentación de solicitudes remata o próximo luns, 8 de outubro  

José Manuel Cores Tourís, delegado territorial da Xunta de Galicia en Pontevedra

Infogauda / Pontevedra

 O delegado territorial da Xunta de Galicia en Pontevedra, José Manuel Cores Tourís, recordou que segue aberto o prazo de presentación de solicitudes para acollerse á nova convocatoria de axudas para a posta en marcha de  Casas do Maior nos concellos de Pontevedra de menos de 5.000 habitantes, experiencia piloto destinada a atender a homes e mulleres de máis de 60 anos de idade en situación de dependencia moderada e severa.   

 Deste xeito, a Casa do Maior se presenta como alternativa cando, neste tipo de poboacións, non existan recursos de atención para este colectivo ou cando o internamento nese tipo de institucións non sexa desexado, procurando o mantemento no medio social habitual coa finalidade de que ditas experiencias piloto poidan garantir a futura posta en marcha eficiente de servizos de atención en pequenos grupos, de maneira flexible e con garantías de seguridade e calidade.   

 Na actualidade, existen en Galicia 90 localidades susceptibles de implantar nos seus límites este recurso. 

 Cada Casa do maior atenderá a un máximo de cinco persoas, de xeito flexible e con garantías de seguridade e calidade, dado que se esixirá formación ou experiencia profesional específica. Nestes recursos procurarase un ambiente e trato familiar no que se dea resposta ás necesidades dos usuarios. Así, a atención prestada comprenderá a manutención, hixiene, o desenvolvemento de actividades de lecer e/ou cognitivas e prestarase, nun máximo de oito horas de luns a venres durante todo o ano, excepto os días festivos e un mes de cada 12, no que a casa do maior permanecerá pechada por vacacións. 

 Poderán ser beneficiarias destas axudas as persoas físicas que se establezan como empresarios autónomos ou que constitúan cooperativas de traballo asociado nas que alomenos un dos socios/as estean en posesión dun título de grao en enfermería, medicina, de técnico en coidados auxiliares de enfermería, de técnico de atención a persoas en situación de dependencia, de técnico superior en integración social, o certificado de profesionalidade de atención sociosanitaria a persoas dependentes en institucións sociais, o certificado de profesionalidade de atención sociosanitaria a persoas no domicilio ou o diploma que acredite a realización de cursos de formación integral e/ou complementaria para futuros profesionais da casa do maior. 

 Esta iniciativa conta cun investimento global de 1.360.637 millóns de euros para as anualidades 2018 e 2019. As axudas para gastos de investimento serán de ata o 100% dos gastos e un máximo de 15.000 euros por cada casa. Serán subvencionables, ao amparo desta convocatoria, a reforma e adaptación da vivenda destinada a servir como casa do maior, o seu equipamento e a dotación de material. Así mesmo, subvencionares a prestación da atención individualizada dos usuarios, que consistirá nunha prima de 19.600 euros ao ano. 

 As axudas concederanse en réxime de concorrencia competitiva, prestando atención a criterios como a inexistencia de recursos comúns de atención ás persoas maiores nos concellos onde pretenda implantarse a casa do maior e a contribución á integración laboral de persoas en situación de especial protección. 

 Ademais de incrementar a cobertura e a calidade da atención aos galegos e galegas, esta convocatoria favorece as fórmulas de autoemprego e de economía social que demostraron ser eficaces para a dinamización económica en zonas rurais e para a fixación da poboación ao territorio, creando oportunidades laborais en territorios afectados polo declive demográfico.