MÁIS DE 1.500 PERSOAS PARTICIPARÁN NO DESFILE DO ‘VENRES DE FOLIADA’ DE TOMIÑO
EN TOTAL INSCRIBÍRONSE 26 AGRUPACIÓNS DE 10 CONCELLOS PONTEVEDRESES, DAS QUE SEIS FORON DESCARTADAS. O DESFILE SERÁ O 9 DE FEBREIRO ÁS 21.30 HORAS
Infogauda / Tomiño
Tomiño segue a prepararse para festexar o Entroido por todo o alto e para acoller ás máis de 1.500 persoas que participarán no desfile de comparsas do tradicional ‘Venres de Foliada’. Este ano inscribíronse un total de 26 agrupacións, das que seis foron descartadas, xa que cada ano o entroido tomiñés conta cun máximo de 20 comparsas que percorren as rúas da vila enchéndoas de luz, música e cor.
Coa celebración do tradicional ‘Venres de Foliada’ Tomiño arranca o entroido na comarca, xa que é o primeiro desfile de comparsas que se celebra durante estas datas no Baixo Miño. Entre os proxectos presentados aparecen comparsas de ata 10 localidades distintas: ademais de cinco agrupacións de Tomiño (Revolución Show, Asociación Comparsa Luces de Tomiño, Comparsa Estrelas da Noite, Asociación Cultural Ciklón e Festa do Árbol), inscribíronse no desfile entidades de Ponteareas, Mos, Salceda de Caselas, Vigo, Pontevedra, Gondomar, Tui, Nigrán e Marín.
Nesta XXI edición do ‘Venres de Foliada’, o 65% das comparsas participantes terán máis de 81 membros (13), mentres que outras 5 contarán con máis de 61 integrantes e outras dúas con máis de 41. O número de compoñentes da comparsa e a descrición do proxecto na solicitude, así como a localidade de procedencia, xa que as comparsas tomiñesas tiñan prioridade, foron os criterios seguidos para facer o baremo final.
Saída ás 21:30 horas no colexio Pedro Caselles
O desfile celebrarase o vindeiro venres 9 de febreiro ás 21:30 horas. A saída do desfile situarase un ano máis no colexio Pedro Caselles e a orde de participación das comparsas será por rigoroso orde de chegada ao lugar onde comeza o desfile. En caso de choiva, o evento trasladarase ao venres 16 de febreiro á mesma hora.
Dende o goberno municipal quérese agradecer a gran labor que desenvolven este día os voluntarios de Protección Civil, a Policía Local e os traballadores do concello para garantir que tanto participantes como público poidan desfrutar do evento ao máximo e sen contratempos.
Ningún comentario:
Publicar un comentario