A GUARDA

CULTURA

Pepe Carreiro presenta ante o alumnado guardés  «Os Bolechas na desembocadura do Miño»  

A concelleira de Educación, María Elena Baz Rodríguez, facendo entrega de exemplares do novo libro «Os Bolechas na desembocadura do Miño», do debuxante Pepe Carreiro

Fotos: C.A.G.

Infogauda / A Guarda

 O alumnado dos colexios da Guarda recibiu esta semana o novo libro do debuxante Pepe Carreiro «Os Bolechas na desembocadura do Miño», da man do alcalde, Antonio Lomba Baz, e a concelleira de Educación, María Elena Baz Rodríguez. 

 Os representantes municipais visitaron o pasado mércores os centros escolares do municipio para facer entrega do agasallo ás alumnas e alumnos de todos os cursos de educación especial, infantil e primaria, de xeito que puidesen ler e ollar a obra antes da súa presentación oficial co autor. 

O debuxante Pepe Carreiro dibuxando na Casa dos Alonso, diante de máis de 200 cativos e cativas dos centros de educación primaria e infantil 

 Ao acto de presentación, celebrado esta mesma mañá na Casa dos Alonso,  acudiron máis de 200 cativos e cativas dos centros de educación primaria e infantil PP. Somascos, As Solanas, A Sangriña e M. R. Sinde, o centro San Xerome Emiliani e a escola de educación infantil da Gándara.   

 As pequenas e pequenos tiveron a oportunidade de aprender a debuxar os populares personaxes creados por Pepe Carreiro e mesmo de resolver as súas dúbidas. Así, Carreiro confesou non ter un Bolechas favorito e lembrou o seu primeiro libro («Os Bolechas lavan o can») publicado fai 18 anos e ao que se seguiron máis de 500 novas historias, tres das cales teñen A Guarda como protagonista.  

«Os Bolechas na desembocadura do Miño»

Os Bolechas coñecen a Xunqueira, na parroquia de Salcidos, unha zoa de especial interese ornitolóxico

© Pepe Carreiro

 A popular familia de irmáns Bolechas e o seu can trasládanse nesta ocasión á parroquia de Salcidos, onde reside a súa amiga Sabela. Ela levaraos pola beira do río Miño -pasando pola Xunqueira, a praia do Forte - tamén coñecida como praia do Muíño e o Puntal, entre outras localizacións- á procura dun mazarico. No proceso, os cativos coñecerán novos lugares, así como a fauna e a flora característica do municipio guardés. 

 A edición do libro contou co financiamento da Deputación de Pontevedra no marco das subvencións para a dinamización lingüística da institución provincial.