VIGO

O Partido Comunista de Galicia solidarízase cos traballadores de VULCANO e apoia o peche indefinido do persoal de Vulcano nas instalacións da empresa

Desde o día 8 pola mañá, os traballadores de Vulcano protagonizan un peche indefinido nas instalacións do estaleiro vigués no barrio de Teis, en Vigo. A situación problemática que atravesa o estaleiro xunto coa súa filial Juliana en Asturias obrigou aos traballadores a mobilizarse en defensa dos seus postos de traballo.

O estaleiro foi históricamente un exemplo de loita obreira, das súas bancadas saíron grandes dirixentes obreiros comunistas como Waldino Varela, Antonio Sangabriel, etc.. que souberon manter a loita nos diferentes momentos de dificultades que o sector naval vigués sufriu nas últimas décadas. Por iso, somos conscientes que os traballadores e traballadoras de Vulcano afrontarán esta loita co mesmo empeño e coa mesma solidariedade do resto dos cidadáns que entón.

O PCG quere denunciar a actitude do Ministerio de Industria cuxo organismo PYMAR (Fondo Patrimonial de Garantías de Pequenos e Medianos Estaleiros Sociedade de Reconversión) negou os avais á empresa tanto para a continuación da construción do buque 553 con data de entrega en xullo 2011 que se atopa xa en bancadas, como o apoio para a venda do estaleiro Juliana a ARMON, operación que significaría o retorno á estabilidade económica do estaleiro, e que xa contaba co acordo das organizacións sindicais, a propia dirección da empresa e a Xunta de Galicia.

O PCG reclama un compromiso real e non propagandístico da Consellería de Industria da Xunta e quere denunciar a actitude do Ministerio de Industria e da banca financiadora da actividade industrial da planta que en ningún caso teñen en conta que a súa actitude está pondo en grave perigo centos de postos de traballo e o futuro dun estaleiro con carga de traballo actual e cun prestixio no sector naval europeo contrastado.

O PCG chama á cidadanía de Vigo de novo á loita polos nosos estaleiros, polo futuro industrial da nosa comarca.

Como nos anos 70, como na terrible reconversión dos 80, os comunistas vigueses e de toda Galicia van estar de xeito conxunto cos traballadores, de Vulcano, de Barreiras, de Freire saíron os cadros do PCG, da súa loita, do seu exemplo de solidariedade xeracións enteiras de traballadores e traballadoras aprendemos estes anos. É o momento de devolver o favor aos compañeiros de Vulcano

VIVA A LOITA DA CLASE OBREIRA

TODOS SOMOS VULCANO