O BAIXO MIÑO

Caminha, O Rosal e A Guarda dan un paso histórico cara á Eurocidade  

• A constitución da Eurocidade da Foz do Minho entra nunha nova fase coa presentación, este venres, do proxecto elaborado polos tres municipios  

Vista da Foz do Miño

Foto: Infogauda

Ricardo Rodríguez Vicente/A Guarda

 Hai fronteiras que separan e hai fronteiras que, co paso do tempo, aprenden a converterse en pontes. Na desembocadura do Miño, esa vontade de unión comeza a dar un novo paso adiante.  Caminha, O Rosal e A Guarda avanzan cara á constitución da Eurocidade da Foz do Minho, un proxecto que pretende reforzar os lazos entre tres municipios unidos pola xeografía, pola historia e por unha realidade transfronteiriza que forma parte da vida cotiá das súas xentes.

 Caminha, O Rosal e A Guarda avanzan cara á constitución da Eurocidade da Foz do Minho, un proxecto que pretende reforzar os lazos entre tres municipios unidos pola xeografía, pola historia e por unha realidade transfronteiriza que forma parte da vida cotiá das súas xentes.  

 O próximo venres, 9 de outubro, será presentado o proxecto que se vén traballando para facer realidade esta Eurocidade. Será un momento especialmente significativo, pois supón avanzar desde a vontade compartida cara á definición dun proxecto común para un territorio que mira ao futuro desde as dúas beiras do Miño.  

 A iniciativa nace coa vocación de crear pontes entre territorios de fronteira, impulsar a cooperación e poñer en valor as enormes posibilidades que ofrece este espazo común. Porque o Miño, máis que unha liña que separa, é tamén un río que une, un espazo de encontro e unha oportunidade para construír novas relacións entre as comunidades de ambos lados.

 A Eurocidade aspira a abrir novas vías de colaboración en ámbitos como a cultura, o turismo, o desenvolvemento económico, o patrimonio, o medio ambiente ou os servizos á cidadanía. Pero, sobre todo, parte dunha idea sinxela: xuntos, os tres municipios poden proxectar con maior forza o territorio que comparten.  

 A presentación do venres será, polo tanto, un primeiro fito nun camiño que aínda ten moito percorrido por diante. Un camiño no que será necesario sumar vontades, consolidar acordos e transformar a proximidade xeográfica nunha verdadeira cooperación transfronteiriza.  

 Estamos diante dos primeiros pasos dunha iniciativa que pode marcar unha nova etapa para a Foz do Minho. Un territorio con identidade propia, con historia compartida e cun futuro que comeza a escribirse de maneira conxunta.

 Caminha, O Rosal e A Guarda dan un paso histórico cara á Eurocidade. E, con eles, tamén dá un paso adiante a idea de que as fronteiras poden ser lugares de encontro, de colaboración e de oportunidades.  

 O futuro será de unión. E as pontes - en sentido figurado, obviamente - que hoxe comezan a construírse poden ser as que mañá permitan que este territorio avance, medre e se proxecte unido.