DEPORTES

ATLETISMO

Choiva de medallas para a Sociedade Atlética do Trega (Tomiño)  

•  Destacados postos para os atletas da entidade tomiñesa nas dúas frontes abertos, tanto no Campionato Provincial de Cros Xogade escolar como no XLVIII Trofeo de Campo a través de San Miguel de Oia

Grupo de integrantes da base da Sociedade Atlética do Trega

Sociedade Atlética do Trega / Redacción Deportes

 A pasada fin de semana foi moi positiva para a Sociedade Atlética do Trega (Tomiño), que logrou un notable número de podios tanto no Campionato Provincial de Pontevedra de Cros do programa Xogade como no XLVIII Trofeo de Campo a través de San Miguel de Oía, confirmando o bo traballo que vén realizando nas categorías de base.  

 Na xornada do sábado, nunha mañá solleira, o recinto feiral de Vincios (Zamáns) acolleu a segunda fase do programa Xogade, cunha ampla participación de colexios e clubs de toda a provincia. A entidade tomiñesa destacou cun total de cinco medallas, repartidas en catro individuais e un título por equipos. Ademais, outros atletas do club lograron clasificarse entre os dez primeiros das súas respectivas categorías, obtendo o correspondente diploma conmemorativo e a bufanda acreditativa do programa Xogade.  

 A nivel individual, os resultados foron os seguintes: Sergio Silva Souto logrou a medalla de bronce en categoría sub16 masculina; Alba Vasconcellos Rodríguez conseguiu a prata en sub16 feminina; Nadia Conejo Bascoy proclamouse campioa provincial en sub14 feminina; e Adela Vasconcellos Rodríguez obtivo o bronce en sub12 feminina.  

 Na clasificación por equipos, o conxunto sub14 masculino, formado por Hugo Rodríguez Gómez, Martín Rodríguez Castro, Xoel Pérez Montero, Martín Piñeiro Casaleiro, Amancio Cortiñas Diego e Moncho Pérez Carreiro proclamouse campión provincial.  

 Para pechar unha intensa fin de semana de cros, o domingo varios atletas do club participaron no XLVIII Trofeo de Campo a través de San Miguel de Oia, onde tamén se obtiveron bos resultados e clasificacións dentro dos 10 mellores. En sub16 feminina, unha representante do club finalizou entre as dez primeiras posicións.  

 En sub14, Alba Vasconcellos Rodríguez e Sergio Silva Souto lograron senllas primeiras posicións, mentres que Hugo Rodríguez Gómez foi terceiro. En sub12, Nadia Conejo Bascoy e Martín Rodríguez Castro conseguiron a vitoria; Amancio Cortiñas Diego foi segundo; e Adela Vasconcellos Rodríguez, terceira.  

 En sub10 masculino, Lucas González Pérez subiu ao podio coa terceira posición, mentres que outro atleta do club finalizou entre os dez primeiros. En sub8 feminina, Ainoa Conejo Bascoy logrou o primeiro posto, completándose a participación do club cunha atleta máis clasificada dentro das 10 mellores.  

 O conxunto de resultados deixa un balance moi positivo para a Sociedade Atlética do Trega en competicións rexionais.