A Feira do Viño do Rosal abre a inscrición á cata dirixida polo experto Pedro Ballesteros Torres
A cata dará o pistoletazo de saída á XXX edición da Feira este venres 7 ás 12.30 horas no Restaurante Juan
As persoas interesadas poden xa facer a súa reserva a través dun formulario web. Terá un custo de 10 euros e prazas limitadas
Infogauda / O Rosal
A
Feira do Viño do Rosal xa está a ultimar os detalles para celebrar o seu 30
aniversario cunha volta á normalidade e moreas de actividades para todos os
públicos. Como ven sendo habitual, a cata comentada dará o pistoletazo de saída
a unha feira “na que retomamos esa convivencia que tanto botabamos en falta
durante a pandemia e na que haberá viño da D.O. Rías Baixas subzona do Rosal
combinado con moita música, gastronomía e moito lecer para maiores e cativos e
cativas”, salienta a alcaldesa, Ánxela Fernández Callís.
A
cata comentada de nove viños será este venres 7 de outubro ás 12:30 horas no
Restaurante Juan e estará dirixida por Pedro Ballesteros Torres, primeiro español
Master of Wine (en galego, Mestre do Viño), enxeñeiro agrónomo con mestrado en Viticultura e Enoloxía e
unha das persoas que máis sabe de viño no mundo. Ballesteros é columnista en
varios xornais e revistas en España e Bélxica e escribe regularmente para publicacións
de viños no Reino Unido e en Italia, traballando en catro idiomas. Ademais,
preside algúns concursos internacionais, incluíndo os prestixiosos DWWA de
Decanter, 5Stars de Vinitaly, Concours Mondial Bruxelles ou Bacchus, entre
outros.
Activo
nos campos de promoción e educación, Ballesteros é membro do Consello do
Instituto Master of Wine, da xunta directiva da Unión Española de Catadores, do
Consello da Federación Internacional de Xornalistas de Viño, do Comité Vino do Basque Culinary Center, así como mebro da Gran Orde de Cabaleiros do Viño.
Entre os seus últimos traballos bibliográficos destaca o seu libro ‘Comprender el vino. Casi todo lo que aún no te había contado de los viños españoles’, unha obra na que Pedro Ballesteros Torres proponse axudarnos a coñecer e
entender os principais caldos españois, xa que para el os viños contan o pasado
máis ou menos recente, pero tamén poden apuntarnos algo sobre o futuro, as súas
posibilidades e as súas saídas comerciais.
As
persoas interesadas en participar na cata comentada deberán inscribirse previamente a través dun formulario web. A participación nesta
actividade terá un custo de 10 euros por participante e tras a inscrición a
organización contactará coas 30 primeiras persoas inscritas para xestionar a
recepción e validación da transferencia obrigatoria para o acceso á cata. Para
calquera dúbida as persoas interesadas poderán poñerse en contacto a través do
teléfono 619 960 240 ou do correo electrónico confrariavinorosal@gmail.com.
Ningún comentario:
Publicar un comentario