DEPORTES

CICLISMO

LOUZÁN CONSIDERA QUE AS ETAPAS PONTEVEDRESAS DE LA VUELTA SERÁN “DETERMINANTES” PARA DECIDIR AO GAÑADOR DA PROBA

Confía en que a ocupación hoteleira nas Rías Baixas mellore en setembro con motivo da volta a España

·        O presidente da Deputación presentou o folleto que recolle punto por punto o paso do pelotón ciclista pola provincia

·        A información estará dispoñible en todas as oficinas de Turismo da provincia desde hoxe

·        Louzán destaca que a edición deste ano reúne “aos mellores ciclistas do mundo”

·        A caravana da volta estará aloxada tres días en Pontevedra

Infogauda / Pontevedra

 As dúas etapas pontevedresas de La Vuelta serán “determinantes” para decidir ao gañador da proba e iso pode supor un “aliciente” para que moitos seguidores deste deporte se acheguen no mes de setembro ás Rías Baixas.

 Así o considera o presidente da Deputación, Rafael Louzán, que esta mañá presentou o folleto no que se recolle punto por punto o paso do pelotón pola provincia. O folleto estará dispoñible desde hoxe mesmo en todas as oficinas de turismo da provincia, co obxectivo de que “todos poidan coñecer por onde vai pasar e animar a moitos que nos visitan estes días a volver ás Rías Baixas a mediados de setembro” para disfrutar da volta.

 Louzán indicou que esta edición da volta conta “cos mellores ciclistas do mundo” e iso é un aliciente para achegar á provincia e a Galicia a moitos seguidores deste deporte.

 Neste sentido, o titular da Deputación amosouse confiado en que a ocupación hoteleira sexa moi positiva no mes de setembro, como consecuencia deste evento deportivo. De feito, a caravana completa da volta hospedarase en hoteis da provincia durante 3 días e permanecerá en Galicia 6 ou 7 xornadas.

 Louzán destacou que o tramo final das dúas etapas pontevedresas “serán un verdadeiro espectáculo” e animou a todos a disfrutar del achegándose tanto ao alto de Domaio como ao Castrove.

Etapas

 En canto ao percorrido das dúas etapas pontevedresas, a primeira delas, o 11 de setembro, parte de A estrada e terá o Monte Castrove como meta.

 Cun percorrido de 157 quilómetros, os corredores pasarán por A estrada, Cuntis, Moraña, Caldas de Reis, Valga, Pontecesures, Catoira, Vilagarcía de Arousa, Vilanova de Arousa, Cambados, Cambados, Ribadumia, Meaño, Sanxenxo, Poio e Pontevedra.

 A segunda etapa, o día 12, partirá da Praza do Concello de Salvaterra de Miño e pasará por Ponteareas, O Porriño, Tui, Tomiño, A Guarda, O Rosal, Oia, Baiona, Nigrán, Vigo, Redondela, Soutomaior, Vilaboa, Moaña, para rematar en Cangas, na Alameda Vella. Serán 180,5 quilómetros.

Folleto co detalle do percorrido (PDF)