DEPORTES

BALONMÁN FEMININO

O Guardés cae na Supercopa de Galicia, que queda en Porriño (27-23) 

• O Mecalia caeu este domingo en Vilagarcía de Arousa fronte ao Porriño, finalizando a súa pretemporada cunha derrota na Supercopa de Galicia 

• A pesar dunha gran primeira parte, as de Ana Seabra pecaron de descoordinación e moitos erros na segunda metade, fronte a un conxunto porriñés onde todo funcionaba 

• Aínda co mal resultado, destacou o papel de Amandine Balzinc, con 12 paradas, e de Elena Martínez, con cinco goles 

O Mecalia Atlético Guardés pechou este domingo a súa pretemporada

Foto: M.A.G.

Redacción Deportes / Vilagarcía de Arousa

 O Mecalia Atlético Guardés pechou este domingo a súa pretemporada cunha derrota significativa na Supercopa de Galicia. Tras un inicio de partido prometedor, en que as de Ana Seabra impuxéronse sen demasiado problema ao Conservas Orbe Zendal BM Porriño, na segunda metade o rival porriñés se rearmó para darlle a volta ao marcador e zurrar ao equipo miñoto. Os erros defensivos e a desconcentración no ataque sentenciaron o partido, a pesar de achegas importantes como a de Amandine Balzinc na portería, con 12 paradas, ou a de Elena Martínez no lanzamento, con cinco acertos. 

 O partido abriuse cun acerto de Elena Martinez ao primeiro minuto do comezo, que transformaba unha perda do conxunto porriñés. A mesma repetiu a xogada pouco despois, e o Guardés colocábase a 0-2 demostrando unha clara superioridade ofensiva neste inicio de Supercopa, mentres que o seu compatriota non logrou responder ata que Carmen Prelchi acertou desde a liña de 7 metros un par de minutos despois. (1-2, min. 5). 

 E aínda que pronto Aitana Santomé logrou empatar o encontro, Lorena Téllez foi rápida para devolver o marcador ao liderado guardés. Aínda que as súas estaban a ser prexudicadas por distintas faltas e excesos na defensa, polo momento o seu rival non atopaba máis ocasións para facerlle fronte. Ceci Cacheda culminou unha nova xogada perfecta e o equipo miñoto comezaba a afastarse no marcador, tamén da man dunha Amandine Balzinc que estaba a cumprir na portería (2-4, min. 10). 

 Pasaban os minutos e o Mecalia seguía sacando músculo nesta primeira parte. Acertou Rosane Serrano desde os sete metros e Balzinc seguiu sendo un muro baixo paus, con cinco paradas acumuladas xa ata este momento. O Porriño sumaba, pola súa banda, máis de dez minutos sen apuntarse un tanto (2-5, min. 15). 

 Encaixouna Anouk Nieuwenweg na rede de Ana Palomino, e o marcador íase xa cara a un perigoso +4 que puxo en alerta ás de Isma Martínez, quen espertou de súpeto para poñer sobre a mesa un demoledor parcial 3-0 que devolvía o encontro a unha distancia moito máis impredicible (5-6, min. 19).  

 A falta de dez minutos para o ecuador do partido, o Guardés non podía deixar que o ánimo decaese. E aínda que un novo penalti da man de Elena Martínez axudou, Paulina Buforn fixo o propio para demostrar que as súas estaban no partido. Ante o bloqueo, ou máis ben a incapacidade para volver crecerse, Ana Seabra convocou ás súas xogadoras para un tempo morto (6-7, min. 22). 

 Pero de pouco serviu, pois o Porriño iniciara a súa misión e nos compases seguintes reforzou con máis ímpeto a súa barreira defensiva e logrou asestar un novo parcial 2-1 que devolvía o encontro ás táboas, para rematar a faena cun roubo rápido que, por primeira vez en todo o partido, poñíao por primeira vez por diante (9-8, min. 25). O rival miñoto, con todo, non se amedrentou e reaccionou a tempo, subindo o ritmo do encontro ata o frenético cun baile de pregunta-resposta no que ambos os equipos se turnaban para encaixar o esférico na rede.  

 Tentouno Ceci Cacheda ata a saciedade, coa esperanza de saír da vantaxe mínima de fronte ao descanso, e ao final quen logrou o último gol guardés foi María Sancha. Pero de pouco serviu, pois as de Isma Martínez lograron responder na seguinte xogada, de maneira que o ecuador do partido selábase cunha renda mínima a favor do Guardés que este trataría de inchar durante a segunda metade (10-11, min. 30). 

 Á continuación sentía a mesma tensión, aínda que o Mecalia parecía baixar algo o ritmo. As de Seabra demostraron nos compases iniciais una certa présa ou desconcentración que as levou a varios erros e precipitacións, tanto en ataque como en defensa, grazas aos que o conxunto porriñés puido empatar de novo (12-12, min. 35). Seguía salvando os mobles Amandine baixo paus, quen adiviñara as intencións rivais ata en once ocasiones ata o momento. 

 O partido seguiu esta dinámica durante un bo intre, co luminoso debaténdose entre o empate e a vantaxe mínima a favor do Porriño. O Guardés non resolvía aínda os seus ocos defensivos e tiña moitas dificultades para penetrar na barreira rival, fóra dunha Elena Martínez que foi a máxima goleadora da escuadra miñota. Pola súa banda, aínda que os seus compatriotas galegas parecían empezar a despegarse (17-15, min. 41), non lograban tampouco aproveitarse dos fallos guardeses como para quitarllas de encima por completo. 

 A desconcentración comezaba a ser un problema grave nas filas visitantes, con perdas de balón inusuais que poñían en bandexa as posibilidades de crecer para as de Isma Martínez. Os ocos en defensa, ademais, non permitían a Balzinc resolver agora os lanzamentos rivais con tanta facilidade, e o Porriño chegou a ostentar a maior vantaxe ao seu favor de todo o encontro (21-17, min. 47). A preparadora do Guardés volveu solicitar parar o crono: o partido non podía seguir a mesma dirección. 

 Pero así foi. As de Seabra tiveron varias oportunidades para seguir crecendo, pero a gran maioría delas víronse freadas por unha Isa Rodrigues moi atenta á portería, e todas elas contrarrestadas por un rival ao que nada lle saía mal nestes momentos. A renda porriñesa chegou aos seis goles (25-19, min. 55), levantada por un acerto desde a liña de penalti que non acompañaba, en cambio, ao Guardés. 

 E aínda que puido recuperarse por momentos grazas á presión defensiva que chegaba ao centro da pista, o Mecalia non tivo xa moito máis que dicir e a Supercopa de Galicia gravouse este ano con letras porriñesas (27-23, final). O equipo miñoto enfrontábase así á súa primeira derrota desde o inicio dunha tempada que seguiría coa terceira xornada ligueira unha semana despois en casa do Grafometal A Rioxa.    

Conservas Orbe Zendal BM Porriño (10+17): Aitana Santomé (3), Adriana Mallo (1), Paulina Buforn (6), Alicia Campo, Julia Figueira (1), Ana Palomino (p.), Adriana Rial [sete inicial], Ekaterina Zhukova (4), Carolina Bono (4), Iria Benaches, Isa Rodriguez (p.), Viktoria Zsembery, Aroa Fernández, Carmen Prelchi (2), Ugazi Manterola (1) e Lucía Lagoa (4).  

Mecalia Atlético Guardés (11+12): Blazka Hauptman, Ariana Portillo, María Palomo (1), Lorena Téllez (1), Elena Martínez (5), Jazmín Mendoza, Amandine Balzinc (p.) [sete inicial], Sabina Minguez (p.), Cecilia Cacheda (3), Rosane Serrano (1), Cristina Cifuentes (3), Carme Castro (3), Nerea Gil, María Sancha (4), Ania Ramos (1) e Anouk Nieuwenweg (1).  

Marcador cada cinco minutos: 0-2, 2-3, 2-5, 5-6, 8-8, 10-11, 12-12, 16-14, 19-16, 21-18, 24-19, 27-23. 

Árbitros: Ángel Mateos e Abel Juncal. Amoestaron con tarxeta amarela á local Carmen Prelchi e as visitantes María Palomo e Willian Ferrari (segundo adestrador) e excluíron con dous minutos á local Carmen Prelchi e ás visitantes Lorena Téllez, Cristina Cifuentes e María Palomo. 

Incidencias: Final da Supercopa de Galicia, disputada no complexo deportivo Fontecarmoa (Vilagarcía de Arousa).