A GUARDA

A Guarda aumenta a seguridade no parque de patinaxe da Atalaia  

• O Concello instalou unha nova varanda nese recinto e están previstas novas intervencións  

O alcalde Roberto José Álvarez Carrero, e os concelleiros Óscar Alonso Álvarez e Isidro Lomba Lorenzo, supervisando in situ á nova varanda do parque de patinaxe

Foto: C.A.G.

Infogauda / A Guarda 

 O Concello de A Guarda instalou no parque de patinaxe da Atalaia unha nova varanda para aumentar a seguridade desta zona de ocio. Ese elemento de protección conta cunhas barras dispostas de xeito vertical e máis xuntas, de forma que evite a caída de obxectos cara a zona do paseo marítimo ou da zona de estrada.  

 Ademais, presenta unha mellor ancoraxe para aumentar a súa resistencia e duración ante o alto uso e afluencia de mocidade desta zona de ocio do porto. “Ao final o que aporta esta varanda é maior seguridade para usuarios, pero tamén para os viandantes do paseo”, recalca o alcalde de A Guarda, Roberto José Álvarez Carrero.  

 Esta actuación non será a única da zona, pois nas próximas semanas cambiaranse as porterías e canastras da pista multideportiva contigua, xa que ante o uso e os efectos do mar e do tempo presentan un alto desgaste.  

 “Son intervencións que eran necesarias, pois agora coa chegada do verán aumentan os usuarios destas pistas. Ademais, a comezos de agosto teremos o Galifornia Beat nesta zona e debe estar nas mellores condicións”, recorda o alcalde.