DEPORTES

ATLETISMO

Álex Sierpes Pereira, atleta do Vicky Foods Athletics, pulveriza os récords galegos de roteiro Sub-18 e Sub-20 

•  No seu debut nos 10 km en roteiro Vila de Laredo 

Redacción Deportes / A Guarda

 A pasada fin de semana, a familia Sierpes ao completo viaxou a Cantabria para participar nunha das probas máis destacadas do calendario español en roteiro, tanto polo seu alto nivel organizativo como pola calidade dos atletas participantes e a masiva afluencia de público. 

 Na súa estrea nos 10 km en roteiro Vila de Laredo, prestixiosa proba cántabra, Álex Sierpes Pereira, atleta do Vicky Foods Athletics, pulverizou os récords galegos de roteiro Sub-18 e Sub-20,  e quedou a tan só 7 segundos de bater tamén o récord de España. Con tan só 16 anos, o mozo fondista de A Guarda, parou o crono en 30:39, deixando o seu sinal na que podería considerarse unha das carreiras máis rápidas do calendario español en roteiro. 

 Cunha media de 3:04 por quilómetro, Álex Sierpes voou polo circuíto urbano e logrou rebaixar en máis de dous minutos a mellor marca galega histórica na súa categoría. A súa actuación confirma que está chamado a marcar unha época dourada no medio fondo e fondo galego.  

Álex e Christian

  

 Grazas á invitación da organización, os irmáns Sierpes Pereira (Álex e Christian) debutaron a unha idade moi temperá na proba, representando as cores do potente equipo Vicky Foods Athletics, liderado por Isaac Viciosa. Ambos os dous saíron desde o caixón reservado aos atletas de elite e realizaron unha destacada actuación. Con todo, foi Álex quen brillou con luz propia, ao superar o récord galego Sub-18 que ostentaba Anxo Bello Rodríguez (Fogar), establecido o 6 de abril de 2024 en Santiago, e tamén o récord Sub-20, en mans de Jorge Puig Malvar (Sociedad Gimnástica de Pontevedra) desde o 15 de novembro de 2015, en Ourense. 

 Christian Sierpes, de 17 anos, tamén asinou unha notable actuación. Aínda que saíu con maior cautela ao tratarse dunha disciplina aínda pouco habitual para el, completou os 10 km nuns meritorios 33:19. 

 Os adestradores de ambos os dous atletas valoraron a proba como unha experiencia formativa, co obxectivo principal de adquirir ritmo competitivo e sumar experiencia neste tipo de eventos. Subliñaron que, polo xeral, este tipo de distancias non están recomendadas para atletas tan novos debido a que aínda non adoitan adestrarse especificamente para este tipo de percorridos, nin acumulan o volume de carga necesario para afrontalas con garantías. Aínda así, a actuación dos irmáns Sierpes Pereira foi excelente, deixando claro que teñen un prometedor futuro por diante.