ECONOMÍA

O BNG denuncia no Senado que Galiza sexa tratada como “unha gran pila ao servizo de Madrid” no modelo enerxético do Estado 

•  Carme da Silva pregunta ao Secretario de Estado de Enerxía polo sentido de concentrar na Galiza a metade do almacenamento hidráulico previsto no PNIEC 

•  “Non é exportación, é incautación. Non é transición xusta, é espolio” denuncia a senadora do BNG sobre o modelo promovido por Estado e Xunta 

•  A senadora nacionalista agradece a claridade do Secretario de Estado por recoñecer “que se incauta a produción de enerxía e recoñecer que non se xera riqueza e nin industria na Galiza a cambio desa produción” 

Carme da Silva, senadora do BNG 

Foto: Cedida

Infogauda / Madrid

 Carme da Silva denuncia no Senado o modelo enerxético centralista do Estado, que converte a Galiza nun territorio de produción e almacenamento ao servizo doutros territorios, nomeadamente Madrid. A senadora do BNG critica que preto da metade das previsións de almacenamento hidráulico do PNIEC se concentren na Galiza. 

 Na súa intervención, Carme da Silva lembra que existen actualmente até 15 proxectos de almacenamento por bombeo hidráulico no país, cunha potencia instalada próxima os 5.000 MW, localizados maioritariamente na conca Miño-Sil, “a máis explotada do Estado e completamente privatizada ao servizo das grandes eléctricas”. 

 “Este modelo responde ao mesmo esquema do franquismo: zonas de produción e zonas de consumo. A Galiza produce e almacena enerxía para que a consuma Madrid” denuncia a senadora nacionalista, que sinala que o país está sendo tratado como un territorio de sacrificio dentro da planificación eléctrica estatal. 

 A senadora do BNG puxo como exemplo os megaproyectos de Conso II ou da central de Filgueira, promovidos por Iberdrola e Naturgy, advertindo do seu impacto social e ambiental. “No caso de Filgueira está previsto un novo encoro enriba das cabezas da xente de Crecente” afirma da Silva. A senadora cuestiona tamén a coherencia do modelo nun contexto de transición enerxética: “Nun momento no que se fala de avanzar cara a un sistema descentralizado, non ten ningún sentido centralizar a metade do almacenamento só na Galiza”. 

 Ademais, advirte das consecuencias económicas para a cidadanía galega: “Para que esa electricidade chegue a Madrid haberá que reforzar as grandes autoestradas eléctricas. Quen vai pagar ese reforzo? Van ser, outra vez, as galegas e os galegos a través do recibo da luz?”. 

 “Madrid é o gran buraco negro do consumo enerxético do Estado. Non produce electricidade, pero consome a nosa, e ademais pretenden que paguemos o transporte e o reforzo das liñas” denuncia.