TOMIÑO

O Concello de Tomiño impulsa unha reforma integral de eficiencia enerxética no edificio do Campo da Feira  

•  A actuación, cun investimento de preto de 140.000 euros, obriga ao traslado provisional da OMIX e Orientación Laboral á rúa Bos Aires e da Aula CeMIT ás instalacións de Goián  

 

O Concello de Tomiño está a desenvolver un ambicioso proxecto de rehabilitación enerxética no edificio do Campo da Feira

Foto: C.T.

Infogauda / Tomiño

 O Concello de Tomiño está a desenvolver un ambicioso proxecto de rehabilitación enerxética no edificio do Campo da Feira, instalación municipal na que prestaban servizo a OMIX (Oficina Municipal de Información Xuvenil), Orientación Laboral e a Aula CeMIT. A intervención, que conta cun investimento global de preto de 140.000 euros, ten como obxectivo reducir de maneira significativa tanto o consumo de enerxía como as emisións contaminantes desta edificación. 

 A alcaldesa de Tomiño, Sandra González, destacou que esta actuación é “un paso máis dentro da folla de ruta marcada polo Concello para avanzar na eficiencia enerxética e no uso responsable dos recursos, traballando para mitigar os efectos do cambio climático, reducindo o consumo e apostando polas enerxías renovables”. A rexedora engadiu que “esta reforma integral vai permitir dispoñer dun edificio moito máis sostible e eficiente, reducindo os custes de mantemento e ofrecendo uns espazos de maior confort para o uso da veciñanza”.  

 Durante o tempo que duren as obras, os servizos municipais trasladáronse temporalmente a outras sedes. Así, a OMIX e Orientación Laboral atópanse xa operativas nas oficinas situadas na rúa Bos Aires, 4 (local 3), mentres que a Aula CeMIT continúa coa súa programación habitual nas instalacións da Escola Obradoiro de Goián, de luns a venres en horario de mañá, e tamén os martes en horario de tarde. 

 Esta actuación está cofinanciada con fondos municipais e fondos europeos a través do programa Galicia Feder 2021-2027, que achega máis de 111.500 euros do orzamento total. Este apoio permitirá levar a cabo unha reforma integral da eficiencia enerxética que inclúe a instalación dun novo sistema de climatización baseado nunha bomba de calor aerotérmica e en chan radiante, en substitución dos actuais radiadores eléctricos. Ademais, está prevista a renovación do sistema de iluminación mediante tecnoloxía LED de baixo consumo con sensores de presenza e luminosidade, así como a incorporación dun sistema de ventilación con recuperación de calor. 

 Outro dos eixos fundamentais da obra é a mellora da envolvente do inmoble, co reforzo do illamento térmico en cuberta, chan e cerramentos, unha actuación que contribuirá de xeito notable a optimizar o comportamento enerxético da instalación. 

 Unha vez finalizadas as intervencións, o edificio acadará un consumo de enerxía primaria non renovable de 24,53 kWh/m² e unhas emisións anuais de 4,16 kgCO₂/m², o que supón unha redución superior ao 80 % respecto á situación actual.