Tomiñeses no Campionato do Mundo de Piragüismo Sprint e Paracanoe 2025
• Os palistas David Mella e Roi Rodríguez fixeron unha magnífica actuación en Milán, mentres que o adestrador Daniel Costas sumou os éxitos de varios dos seus deportistas
Infogauda / Tomiño
O Campionato do Mundo de Piragüismo Sprint e Paracanoe 2025 reuniu en Milán aos mellores palistas e adestradores do planeta, converténdose nun escaparate do altísimo nivel internacional desta disciplina. Un evento de máxima esixencia no que a representación tomiñesa estivo á altura, deixando o listón ben alto e demostrando unha vez máis a fortaleza do piragüismo local.
O tomiñés David Mella asinou unha magnífica actuación na proba de VL1 200 metros, acadando o 7º posto mundial tras rematar a súa final. Un resultado que cobra especial valor tendo en conta que este ano non foi doado para el, marcado por unha lesión que condicionou a súa preparación. A pesar das dificultades, David consolidouse de novo entre os mellores do mundo, amosando unha enorme capacidade de superación e resiliencia deportiva.
Pola súa banda, Roi Rodríguez regresou ao máis alto nivel competitivo cun excelente 8º posto na final de K1 1.000 metros. A súa volta ao Campionato do Mundo, tras uns anos de ausencia, deixou unha demostración de forza e talento, ofrecendo moi boas sensacións de cara ao futuro e confirmando que segue a ser unha referencia no piragüismo nacional e internacional.
Tamén houbo espazo para recoñecer o gran labor do adestrador tomiñés Daniel Costas, que estivo presente no Mundial acompañando aos seus deportistas e sumando éxitos. Costas asinou unha participación brillante con varias pratas dos seus pupilos destacados: prata no C1 200 con Pablo Graña, prata no C1 5.000 con Jaime Duro e outra prata no C4 500 con Manuel Fontán, Adrián Sieiro, Martín Jácome e Daniel Grijalba. Un balance espectacular que confirma o seu papel como un dos grandes referentes do adestramento de piragüismo en Galicia.
Dende o Concello de Tomiño queremos felicitar a David, Roi e Daniel, así como a todos os seus compañeiros de equipo, polo seu esforzo, dedicación e éxitos neste Mundial. O seu traballo é motivo de orgullo para todo o municipio e un exemplo de constancia, paixón e compromiso co deporte. De seguro virán moitos máis éxitos da man destes rapaces.
Ningún comentario:
Publicar un comentario