A CORUÑA

Grande éxito nas sesións de sinaturas do Viñetas desde o Atlántico 

 • Longas colas e ambiente festivo na carpa da RúaBD para coñecer a Magius, Don Rogelio J e Dave Cooper, protagonistas das sinaturas da tarde de onte no Viñetas desde o Atlántico 

Na tarde de onte mércores, a carpa da Rúa da BD encheuse de persoas afeccionadas que fixeron longas colas para conseguir a sinatura e un debuxo personalizado de Magius, Don Rogelio J e Dave Cooper

Foto: Cedida

Infogauda / A Coruña 

 As sesións de sinaturas do Festival Viñetas desde o Atlántico volveron converterse nun dos puntos máis concorridos da programación. Na tarde de onte mércores, a carpa da Rúa da BD encheuse de persoas afeccionadas que fixeron longas colas para conseguir a sinatura e un debuxo personalizado de Magius, Don Rogelio J e Dave Cooper. O ambiente festivo e a proximidade dos autores co público fixeron destas sinaturas unha das citas máis destacadas da xornada, que se completou tamén con encontros con outros autores nos propios stands das librarías e editoriais participantes.  

 A programación do mércores incluíu, pola mañá, a presentación de Historias do páramo con Alexandre Senande e Pjota; o obradoiro profesional Espada y pluma con Jorge Esteban Urabayen; a presentación de Sentinelas da lúa carmesí e Sentinelas no limiar das tebras con Andrés Castro, Ozo Perozo e Alexandre Senande, así como a visita guiada á exposición dos XIX Premios Castelao. Xa pola tarde, o público puido gozar do cine con Quinografía, do contacontos ilustrado con Juan Rodríguez e do espectáculo Viñetas Late Night «Música & BD» con Magius, Fermín Solís e Don Rogelio J. 

 Este xoves 14, as sinaturas na RúaBD reunirán a Dave Cooper, Magius, Clara e Olivia Cábez, Miguel B. Núñez, Víctor Coyote, Carlos Azagra e Encarna Revuelta, e este venres e sábado repetirán estes mesmos autores aos que se unirá Fermín Solís.