A GUARDA

O GOBERNO DE CARRERO VOTA EN CONTRA DA LIMPEZA E DESINFECCIÓN DOS COLECTORES DO LIXO E DA REPOSICIÓN DE PAPELEIRAS  

Bea Lomba (BNG): “O goberno de Carrero e Fariñas nin é capaz de planificar algo nin de  escoitar as demandas da sociedade”  

 

Bea Lomba, concelleira do BNG

Grupo municipal do BNG / A Guarda

 No pleno celebrado no día de onte no Concello da Guarda o grupo de goberno do PP de Roberto Carrero e Fariñas votaron en contra da moción presentada polo BNG onde se demandaba que o concello cumpra a lei vixente en materia de residuos urbanos, proceda a limpeza e desinfección dos colectores de lixo e a reposición das papeleiras eliminadas.  

 Lembremos que na Guarda, non se cumpre coa recollida separada de bioresiduos, nin tampouco se adaptou a ordenanza como exixe a lei. “Esta neglixencia vai carrexar sancións económicas que acabarán repercutindo nos recibos da veciñanza como non se lle poña solución en breve” sinalou Bea Lomba, concelleira do BNG encargada de defender a moción nacionalista.  

 “Son incapaces de cumprir a lexislación vixente, pero o desinterese  é de tal calibre que son incompetentes tamén para levar a xestión máis básica e de escoitar as demandas da sociedade guardesa” salienta a nacionalista.  Os colectores do lixo desprenden cheiros todo o ano. O chegar o verán os cheiros vólvense insoportábeis en moitas zonas da localidade e contribúen a dar unha imaxe de desleixo que se debería evitar.  

 Roberto Carrero e o seu grupo tamén se negaron a repoñer as papeleiras que retiraran.   

 O BNG da Guarda lamenta a desidia, falta de interese e incapacidade   do alcalde e deste goberno  para corrixir estes problemas e anuncia que continuarán defendendo estas reclamacións elementais da sociedade guardesa.