O BAIXO MIÑO

O Rosal, A Guarda e Caminha presentan a xornada de lanzamento do proxecto da Eurocidade da Foz do Minho e a estrea da súa peza audiovisual conxunta 

As alcaldesas e o alcalde dos tres municipios transfronteirizos darán a coñecer as liñas mestras do proxecto europeo Euro_Foz, cofinanciado polo programa Interreg POCTEP, xunto a representantes da Xunta de Galicia e da CCDR-N. 

Durante o acto proxectarase en primicia o vídeo promocional que percorre os valores patrimoniais e naturais da desembocadura do Miño. 

Infogauda/O Baixo Miño

 Este venres, 9 de outubro, ás 10:30 horas, a sede da Liga de Amigos do Rosal acollerá a Xornada de Lanzamento do proxecto “0554_EURO_FOZ_MINHO - Euro_Foz: Construíndo a Eurocidade da Foz do Minho”, iniciativa transfronteiriza aprobada na 6ª convocatoria do Programa de Cooperación INTERREG VI-A España-Portugal (POCTEP) 2021-2027 e cofinanciada nun 75% con fondos FEDER da Unión Europea. 

 O encontro reunirá aos máximos representantes dos tres concellos impulsores xunto a autoridades transfronteirizas de Galicia e o Norte de Portugal. 

 No marco da xornada presentarase ademais a peza audiovisual do proxecto, unha produción en 4K gravada con drons e cámaras en terra que vertebra a riqueza paisaxística, histórica e cultural compartida por O Rosal, A Guarda e Caminha a través do leito do río Miño.