A GUARDA

A música une a Euskadi e o Baixo Miño: o coro Kaleetan Kantuz enche de vida as rúas da Guarda

O alcalde de A Guarda e o concelleiro de Cultura e Deportes coa directora e compoñentes do coro Kaleetan Kantuz

Foto: Infogauda

Infogauda/A Guarda

 As rúas da Guarda convertéronse na tarde deste venres, 26 de xuño, nun escenario vivo de irmandade e tradición. A partir das 19:00 horas, a nosa vila tivo o luxo de recibir a visita do coro Kaleetan Kantuz, unha agrupación chegada dende Eibar (Gipuzkoa) que ofreceu un singular e emocionante percorrido musical, demostrando que a música popular non entende de fronteiras.

Notas de unión na praza do Reló

 A viaxe sonora arrincou no corazón do municipio. Baixo a firme e talentosa dirección de Iria Muñoz de Santiago, os arredor de 40 integrantes da agrupación plantáronse na praza do Reló para cativar ao público cun repertorio tan variado como enriquecedor. Alí resoaron con forza temas populares de Euskadi, Cantabria, Portugal e, como non podía ser de outra maneira, de Galicia.

 Ao rematar esta primeira estación, o alcalde do Concello da Guarda, Roberto José Álvarez Carrero, xunto ao concelleiro de Cultura e Deportes, Celso Rodríguez Fariñas, fixeron entrega duns agasallos institucionais aos visitantes. Un xesto de hospitalidade que foi correspondido de inmediato con gran gratitude pola formación vasca.

Un camiño cantado ata o porto

 Tras un merecido e pequeno descanso, o fío condutor da música guiou as persoas cantoras polas distintas rúas do municipio. Co seu espírito característico de manter viva a vella tradición de cantar nas rúas, a comitiva avanzou contaxiando ledicia ata chegar á praza de Avelino Vicente. Alí, as súas voces volveron inundar o espazo antes de poñer rumbo cara á emblemática zona portuaria, deixando un ronsel de aplausos ao seu paso.

 Con esta fusión de euskera, castelán, galego e portugués, Kaleetan Kantuz volveu demostrar a súa maxia: crear encontros únicos entre culturas a través do canto compartido.

 A fin de semana musical do coro no Baixo Miño non remata aquí. Tras o éxito colleitado este venres na Guarda, a agrupación porá rumbo mañá, sábado 27 de xuño, cara a Tui, onde continuarán espallando as súas melodías e esa enerxía tan especial que hoxe namorou aos guardeses. Arrancarán na praza da Inmaculada e rematarán na catedral de Santa María de Tui, enchendo de música os rueiros e deleitando á veciñanza e visitantes, levando a súa cultura por bandeira.