A GUARDA

O BNG CHAMA  Á VECIÑANZA  DA GUARDA  A  APOSTAR POLO COMERCIO DE PROXIMIDADE  COA CAMPAÑA “MELLOR LOCAL, MELLOR GALEGO”  

• Os nacionalistas tamén propoñen medidas para revitalizar o sector e que lles garantan estabilidade e condicións xustas as traballadoras e traballadores autónomos

Integrantes do grupo municipal do BNG na presentación da campaña ‘Mellor Local, Mellor Galego’

Infogauda / A Guarda  

 O Bloque Nacionalista Galego chama a apostar polo comercio de proximidade e polo consumo de produtos do país coa campaña ‘Mellor Local, Mellor Galego’. Ademáis de concienciar sobre a importancia dun consumo responsábel, propón medidas para revitalizar o sector e evitar o peche de máis pequenos comercios ameazados polo modelo de grandes áreas comerciais que “só beneficia ás empresas multinacionais”. 

 O BNG defende un marco comercial que protexa as pequenas tendas, que garanta condicións xustas para as persoas autónomas, medidas que lles garantan estabilidade e condicións xustas: cotizacións adaptadas aos ingresos reais, menos burocracia, máis protección social, acceso a financiamento e apoio á dixitalización. Apoiar o traballo autónomo é fortalecer a economía local e o futuro da Galiza.  

 “O comercio  está nunha situación crítica polo avance do comercio en liña, da liberalización dos horarios e dos períodos de rebaixas e pola expansión das grandes superficies comerciais”, alertou o portavoz  do BNG, Anxo Lois Baz Vicente.  

 O nacionalista reivindicou a importancia do comercio local como un dos motores de dinamización da economía guardesa. “O pequeno comercio xera esa vida fundamental nas nosas rúas e crea emprego na nosa vila”, destacou.