DEPORTES

BALONMÁN FEMININO

O Mecalia Atlético Guardés completa o seu cadro de persoal coa Guerrera júnior Rosane Serrano 

• A nova xogadora, de tan só 17 anos, aportará dende a primeira liña 

• Serrano militou este pasado curso no Kukullaga Etxebarri de División de Honra Prata, onde foi a máxima goleadora, se ben destaca por ser unha habitual nas Guerreras Júnior, coas que acaba de ser subcampioa de Europa 

Rosane Serrano

Foto: Cedida

Redacción Deportes / A Guarda

 O Mecalia Atlético Guardés ultima os detalles do seu cadro de persoal para o novo curso. Esta vez, o club miñoto fíxose coa xuvenil Rosane Serrano, unha primeira liña de 17 anos que brilla na Selección Española Júnior e que chegará á División de Honra procedente dunha impresionante tempada en Prata. Unha nova fichaxe que segue baixando a idade media do seu equipo, nun ano no que o Mecalia Atlético Guardés semella apostar pola proxección ao longo prazo.  

 Serrano é natural de Lemoa (Biscaia) e destaca polo seu talento mozo. Con 17 anos e 1,70 metros de altura, desenvólvese sobre o terreo de xogo na primeira liña tanto de central coma de lateral. No curso pasado militou no Kukullaga Etxeberri, da División de Honra Prata, terceira categoría do balonmán feminino español, onde foi a máxima anotadora do equipo con 144 goles en 25 partidos (unha media de 5.76 por encontro), así como a cuarta do seu grupo e tamén unha das primeiras de toda a categoría. As súas características físicas tamén lle permiten aportar significativamente en defensa. 

 É por todo iso que é unha das caras habituais na Selección Española Júnior. Entre a pasada e a actual tempada compartiu varias convocatorias coas Guerreras, e este mesmo mes de xullo foi vital para os impresionantes resultados do histórico paso do conxunto nacional polo Campionato de Europa 2025, no que conseguiu o segundo posto. Rosane é, en definitiva, un perfil moi interesante para a primeira liña dun Mecalia Atlético Guardés que apostou ao grande polo futuro e a proxección do seu cadro de persoal nos seus movementos no mercado de fichaxes de cara á vindeira tempada. 

 Serrano é a sexta fichaxe que completa o cadro de persoal 2025/2026 do equipo da Guarda, xunto con Anouk Nieuwenweg, Lorena Téllez, Ariana Portillo, Sabina Mínguez e Nerea Gil. As seis súmanse ás dez renovacións do equipo: Cristina Cifuentes, Cecilia Cacheda, Blazka Hauptman, Ania Ramos, María Sancha, Carme Castro, Elena Martínez, Estela Carrera, María Palomo e Jazmín Mendoza, e xunto a todas elas estarán baixo os mandos de Ana Cristina Teixdeira Seabra á fronte do corpo técnico.  

Rosane Serrano: “A súa historia, identidade e valores fan do Guardés un lugar ideal para seguir formándome” 

 Rosane Serrano indica que se sinte “moi contenta de comezar no Guardés unha nova aventura”. “A súa historia, identidade e valores fan deste Club un lugar ideal para seguir formándome como xogadora e persoa”, engadiu a biscaíña, que será a máis nova dun plantel onde poderá aprender de deportistas veteranas e experimentadas. 

 A nova primeira liña tamén dedicou unhas palabras á afección guardesa, e declárase “ilusionada” por “coñecer ao Inferno da Sangriña e celebrar xuntos”. Polo demais, e apenas a unha semana do primeiro adestramento oficial da tempada, Rosane explica que se atopa “con moitas ganas de empezar, aprender e cumprir obxectivos”.