SOCIEDADE

O Camiño Portugués da Costa achega algo máis do 17% dos peregrinos a Compostela nos cinco primeiros meses do ano 

Un peregrino catalán descansa cerca do Mosteiro de Oia

Foto: Antón Ferreira

Antón Ferreira

 No recén rematado mes de maio, o Camiño Portugués da Costa desbancou ao Camiño Portugués Central e foi o segundo máis transitado, despois do Francés, con 15.224 peregrinos, o que supuxo un crecemento do 20,21% respecto ao mesmo mes do ano pasado. En primeiro lugar segue destacando o Camiño Francés, con 35.403 peregrinos (4,24% superior a 2024), e en terceiro lugar sitúase o Camiño Portugués Central con 14.844 peregrinos (un crecemento do 4,44%). 

 As cifras constatan que o Camiño Portugués da Costa reduce distancias, cada ano, con respecto aos camiños Francés e Portugués Central. Se en maio de 2024, o Portugués Central superaba en 1.548 peregrinos ao Portugués da Costa, no pasado mes do presente ano, a diferenza foi de 2.559 peregrinos, pero a favor do histórico Camiño Portugués da Costa que entra en Galicia pola Guarda desde Caminha; e respecto ao Francés, hai un ano, no mesmo mes de maio, este superaba ao da Costa, en 21.299 peregrinos, e en maio de 2025, a diferenza baixaba a 20.179. O Camiño Portugués da Costa, no que levamos de ano, representa xa o 17,52% do total de peregrinos que este ano recolleron a Compostela; un 19,86% seguiron o Camiño Portugués Central e, o Francés fixérono o 46.03% dos 153.806 peregrinos que xa chegaron a Santiago de Compostela entre xaneiro e maio. 

 Respecto dos países de procedencia dos camiñantes, no pasado mes de maio, o Camiño Portugués da Costa recibiu peregrinos de 66 países: EE.UU (2.140), Alemaña (1.860), España (1.538), Portugal (902) e Italia (815), ocupan os primeiros postos. Respecto dos peregrinos nacionais, destacan os procedentes de Madrid (405), Comunidade Valenciana (219), Cataluña (198), Andalucía (146) e Galicia (124), no cinco primeiros lugares. 

 111 países estiveron representados polos seus camiñantes no Camiño Portugués da Costa durante o mes de maio.  

 Por punto de partida, Porto, segue sendo a saída de referencia con 4.611 peregrinos, seguíndolle Vigo (2.647), Baiona (1.556), A Guarda (522) e Viana do Castelo (431).        

 No primeiros cinco meses de 2025, polo Camiño Portugués da Costa chegaron a Santiago 26.974 peregrinos (22.831, fixérono en 2024). 

 Tamén o perfil de Facebook dedicado ao “Camiño Portugués da Costa: Porto... Caminha-A Guarda...Santiago”, superou en maio os 12.000 membros.