TUI

Tui despedirá o Entroido co Enterro do Bacallau 

• Sairá este domingo, ás 19.30 h, dende a praza de San Fernando para rematar no aparcamento municipal  

Comitiva do Enterro do Bacallau, nunha edición precedente

Foto: C.T.

Infogauda / Tui

 Tui prepárase para despedir o Entroido, este domingo, 9 de marzo, co Enterro do Bacallau. Centos de persoas reuniranse para participar nunha festa que conta cunha gran tradición, máis aló das persoas integrantes das doce comparsas que o martes participaron no Desfile Concurso.  

 Unha festa que esixe rigoroso loito, algo que a comitiva cumpre cada ano para acompañar ao bacallau. Son xa moitos os que dende primeira hora da mañá comezan a festa nas rúas de Tui, e participan en xantares protagonizados por pratos de bacallau.   

 O Enterro comezará ás 19.30 h na praza de San Fernando. A comparsa “Relativerso” da Asociación Carnavales de Mañufe, gañadora na categoría absoluta no desfile do pasado martes, será a encargada de portar o bacallau, que elabora a comparsa da Picoña gañadora en Carrozas, e amais Mañufe, ao gañar na categoría musical, fará a escolta musical do evento. Dende  a praza de San Fernando iniciarase o percorrido que proseguirá polas rúas Seixas, Porta da Pía,  Ordóñez, Augusto González Besada, Ourense e, finalmente, o aparcamento municipal, onde terá lugar a cerimonia de incineración para dar remate á festa.    

 Debido á celebración do Enterro do Bacallau o domingo de 10 a 22 h non se poderá estacionar no aparcamento municipal na traseira do edificio Francisco Sánchez.