ENOLOXÍA

Adega Pateira presenta os seus viños na Guarda e reforza a súa aposta pola viticultura tradicional 

Benito Álvarez / Redacción A Guarda

 A adega do Rosal presentou catro dos seus viños nunha cata especial en Novo Rumbo, destacando o seu compromiso coa recuperación de viñedos históricos e a produción artesanal. 

 A adega Adega Pateira, situada no Rosal, celebrou onte xoves 13 de marzo, unha cata exclusiva no Novo Rumbo, da Guarda, onde os asistentes puideron degustar catro das súas variedades máis representativas: Rosal Pateira, Pateira Rosé, Buraca e Cabaqueiro. Ademais, realizouse unha presentación especial do seu viño máis emblemático, o Pampaloa Tradición, elaborado con fermentación en barrica de carballo francés. 

 Este evento forma parte da estratexia da adega para dar a coñecer a súa aposta pola recuperación de viñedos históricos e a promoción da diversidade vitícola na rexión do Rosal, unha cata que estivo guiada por Pablo Álvarez.  

Visitas e experiencias en Adega Pateira 

 Para os amantes do viño, a adega ofrece visitas guiadas que inclúen: 

• Percorrido polas súas instalacións e explicación do proceso de vinificación. 

• Degustación de tres viños acompañados de petiscos. 

• Comentarios sobre a viticultura tradicional do Rosal e os seus costumes. 

 As visitas están dispoñibles de luns a venres en horario de mañá e tarde, e as fins de semana só pola mañá. O prezo é de 15 euros por persoa e as reservas poden realizarse a través do teléfono 698 171 172 ou na web www.adegapateira.com. 

Adega Pateira: tradición e calidade no Rosal 

 A historia de Adega Pateira comezou en 1990, cando a familia decidiu recuperar os viñedos do seu antepasado Serafín Araujo, co obxectivo de elaborar viños de autor que reflectisen o carácter único da rexión. Desde entón, combinaron a tradición vitivinícola con técnicas innovadoras para producir viños cunha personalidade distintiva. 

 En 2025, Pablo e Sandra tomaron a substitución da adega, mantendo o respecto polas prácticas tradicionais, pero incorporando novas técnicas para mellorar a calidade dos seus viños. Ademais dos seus propios viñedos, a adega está comprometida coa recuperación de terreos abandonados pola falta de substitución xeracional, revitalizando así a viticultura no Rosal. 

Os viños de Adega Pateira 

 Actualmente, a adega conta con sete variedades de viños, elaborados de maneira artesanal e cun gran recoñecemento entre os amantes do viño. Algúns dos seus máis destacados son: 

• Rosal Pateira: Un branco con notas de froitas de óso e toques minerais, elaborado con Loureira, Albariño e Treixadura. 

• Buraca: Un monovarietal de Loureira, con aromas florais e unha acidez equilibrada. 

• Pampaloa Tradición: Fermentado en barrica de carballo francés, con matices de froitas maduras e notas tostadas. 

• Cabaqueiro: Un monovarietal con crianza en barrica, con toques balsámicos e florais. 

• Pateira Rosé: Elaborado con Mencía e Castañal, con aromas a froitos vermellos e un sabor fresco e equilibrado. 

Compromiso coa calidade e a sustentabilidade 

 Adega Pateira distínguese polo seu compromiso coa sustentabilidade, apostando por unha viticultura responsable que minimiza o uso de produtos químicos e favorece a biodiversidade nos seus viñedos. A adega fusiona tradición e modernidade, utilizando técnicas como a crianza sobre leas e a fermentación en barricas de carballo francés, o que dá lugar a viños cunha personalidade única. 

 Cada botella de Adega Pateira é o resultado dunha coidada elaboración artesanal, garantindo viños cunha calidade excepcional que reflicten a esencia do Rosal.