TUI

Comezan as IV Xornadas Rosendo Salvado  

• Este martes, 25 de febreiro, ás 19.30 h, no novo espazo sociocultural da rúa Camilo José Cela, Valentín Carrera disertará sobre: "A viaxe infinita de Rosendo Salvado"  

Infogauda / Tui

 Este martes, 25 de febreiro, ás 19.30 horas, no novo espazo sociocultural da rúa Camilo José Cela, comezarán as xornadas dedicadas á figura do egrexio tudense Rosendo Salvado que, dende hai catro anos organiza o Concello de Tui arredor do 1 de marzo en que se celebra o aniversario do seu nacemento na nosa cidade no ano 1814.  

 Esta primeira actividade consiste nunha conferencia a cargo de Valentín Carrera, escritor, xornalista, editor, blogueiro, autor de libros de viaxes e de ensaios e director da serie documental sobre Salvado realizada en catro episodios co titulo de “Rosendo Salvado: aventura e misión dun galego en Australia”.  

 Valentín Carrera ofrecerá o relato da súa experiencia de achegamento, descubrimento e fascinación arredor da figura de Rosendo Salvado realizado coa preparación da serie documental ao tempo que revisará o proceso de produción da mesma, recollendo a súa experiencia de gravación da serie en diversos lugares de Galicia e especialmente na abadía fundada por Salvado no occidente australiano, en Nova Nursia. O titulo da súa intervención é "A viaxe infinita de Rosendo Salvado".  

 As actividades programadas nestas Xornadas Rosendo Salvado continuarán nos seguintes días con estas citas:  

Mércores 26 de febreiro, as 19.30 h.

Espazo rúa Camilo José Cela

• Conferencia de Xoán M. Carreira e Maruxa Baliñas: “Salvado y la Sociedad Filarmónica de Perth” 

Xoves 27 de febreiro, ás 19.30 h.

Casa de Galicia, de Madrid (rúa Casado del Alisal, nº 8) 

• Presentación e estrea da serie documental “Rosendo Salvado, aventura e misión dun galego en Australia”, dirixida por Valentín Carrera, que contará coa presenza do alcalde de Tui, Enrique Cabaleiro González. 

Sábado 1 de marzo, as 11.30 h. 

CCXI aniversario do nacemento de R. Salvado en Tui) 

• Paseo “Salvadiano” percorrendo os lugares vinculados a Rosendo Salvado. Inicio na praza de San Fernando. 

• 12,30h.: Colocación dunha coroa de loureiro na casa natal, rúa homónima. 

 Para a concelleira de cultura tudense, Sonsoles Vicente Solla, a figura do tudense Frei Rosendo Salvado Rotea (1814-1900) é unhas das personalidades tudenses de maior proxección, interese e actualidade, que xustifican abondo a celebración destas xornadas anuais. A súa traxectoria atinxe a numerosos aspectos, dende a súa dimensión como misioneiro nas terras de Australia, a súa faceta como músico, investigador etnográfico ou naturalista, o seu labor de promoción da multiculturalidade ou dos dereitos humanos como defensor da existencia dunha única raza humana,..,. son aspectos sobre os que compre afondar para divulgar a súa obra e traxectoria e contribuír a promoción da súa figura e da nosa cidade.