PONTEVEDRA

Con motivo das informacións en medios de comunicación  

CONSULTAS NAS FARMACIAS SOBRE O PROGRAMA DE RENOVACIÓN EXCEPCIONAL DE RECEITAS  

• Trátase dun procedemento excepcional para situacións moi concretas.  

• Os pacientes teñen que continuar como ata o momento pedindo cita co seu médico de familia a tempo de modo que non queden sen receitas e poidan retirar os seus medicamentos na farmacia cando o necesiten.  

Infogauda / Pontevedra 

 Todos os días nas farmacias galegas danse casos de persoas que acoden a retirar os seus medicamentos e, ao realizar o profesional farmacéutico a comprobación no sistema de receita electrónica, non teñen receitas activas do seu tratamento crónico. Os motivos polos que se chega a esta situación son diversos, pero na súa maioría débense a que o usuario non pediu cita a tempo co médico para a renovación das receitas, ou que esta se demora.  

 Ante unha situación deste tipo e unicamente para casos excepcionais nos que non manter a adherencia ao tratamento crónico pode causar un grave prexuízo para a saúde do paciente, a Xunta e os Colexios Oficiais de Farmacéuticos de Galicia poñen en marcha un programa para a renovación con carácter excepcional da prescrición da medicación non demorable: terapia antidiabética, terapia antiepiléptica e anticonvulsivante  só  para  tratamento  de     a epilepsia,  terapia   antipsicótica na enfermidade psiquiátrica e demencia, terapia inmunosupresora do paciente transplantado e terapia cardiovascular.  

 No marco desta iniciativa, ante casos urxentes nos que o paciente non teña cita co médico nin medicación para as seguintes 72 horas e trátese de medicamentos incluídos como non demorables no programa, o farmacéutico poderá iniciar un procedemento contactando en horario de 9 a 21 h de luns a venres cun médico técnico en saúde do Servizo Galego de Saúde para que cite ao paciente e, previa consulta, proceda á renovación da prescrición da medicación crónica, normalmente un envase. Fóra dese horario e eses casos non se poderá facer uso desta vía excepcional, polo que, para resolver a demanda de renovación da súa prescrición, o usuario terá que recorrer ás canles ordinarias de atención sanitaria.  

 As consultas nas farmacias sobre este novo programa sucedéronse desde que se fixo público. Os profesionais farmacéuticos explican aos usuarios que este novo procedemento é excepcional e unicamente para casos moi concretos, polo que cando na farmacia avísenlle de que é a última receita, é o momento no que deben pedir a cita co seu médico.  

 Desde o Colexio Oficial de Farmacéuticos (COF) de Pontevedra a mensaxe á poboación é o mesmo, e sinalan que este programa non evita a cita co médico. “Este procedemento é excepcional para situacións moi concretas, polo que o paciente ten que seguir sendo responsable e pedir a cita co seu médico de familia a tempo de modo que non quede sen receitas e poida retirar os seus medicamentos na farmacia cando o necesite”, sinala a súa presidenta, Beatriz García. 

 O programa dará comezo o luns 24 de febreiro e será obxecto dun seguimento continuo.