O ROSAL

Unha unidade móbil de doazón de sangue visitará O Rosal o 16 de maio  

•  Estará situada na rúa Ramón Franco, 4, de 10 a 14 e de 16 a 21 h  

 

Infogauda / O Rosal

 O Rosal contará a vindeira semana cunha nova visita dunha unidade móbil da Axencia Galega de Doazón de Sangue, Órganos e Tecidos (ADOS). O autobús estará no concello o vindeiro xoves 16 de maio á disposición de todas aquelas persoas que queiran deixar a súa pinga de solidariedade. 

 Como vén sendo habitual, a unidade móbil situarase na rúa Ramón Franco número 4, diante da sucursal de Abanca, e permanecerá aberto mañá e tarde de 10.00 a 14.00 e de 16.00 a 21.00 horas. Todas as persoas que desexen doar sangue poderán solicitar máis información chamando ao teléfono gratuíto 900 100 828. 

 Poderán doar as persoas con máis de 18 anos e máis de 50 kg e deberán ir despois de almorzar se acoden pola mañá ou dúas horas despois de xantar ao mediodía se acoden pola tarde. É importante levar a tarxeta de doazón, o DNI ou un documento similar, ademais de informar ao médico en caso de estar tomando algún medicamento. 

 Ademais das 10 unidades móbiles que se desprazan cada día, a Axencia Galega mantén abertos sete puntos fixos nos principais hospitais galegos na procura de doazóns de sangue que despois son procesadas e preparadas para atender as necesidades diarias de milleiros de doentes os 365 días do ano. Os hospitais galegos precisan ente 400 e 500 doazóns de sangue cada día, arredor de 10.000 ao mes, para garantir a asistencia a todas as persoas que o necesitan.