DEPORTES

PIRAGÜISMO

BO PAPEL DO TEIXUGO MANU OCHOA, NO EUROPEO DE CAIAC CROSS

Manuel Ochoa, do Club Deportivo Miño-Teixugos, nun momento da súa participación no Campionato de Europa de Slálom  

Foto: Marc Etxaniz Pal 

Informa: Rosa Fernández Carrera

 A tempada internacional de slálom deu comezo esta semana na cidade de Tacen, Eslovenia, co Campionato de Europa de Slálom. Manuel Ochoa, do Club Deportivo Miño-Teixugos, foi convocado como integrante do equipo español de caiac cross. Esta nova modalidade do slálom, que se estrea como olímpica en París este verán, esperta cada vez máis interese tanto entre os deportistas como nos afeccionados.      

 O mércores disputáronse as probas contra reloxo para intentar estar entre os dezaseis mellores tempos que pasaban a cuartos de final. Manu fixo unha gran baixada que lle valeu o noveno lugar e o pase a cuartos de final. En cuartos, nos que se enfrontan de catro en catro, Manu tivo un bo comezo pero un erro nunha das portas deixouno fóra das semifinais.          

 A seguinte cita internacional será dentro de dúas semanas en Augsburg, Alemaña, onde se celebrará a 1ª Copa do Mundo de Slálom. Nela o Club Deportivo Miño terá dous representantes na selección española, Luís Fernández en canoa e Manu Ochoa en caiac.