A GUARDA

A praia do Forte (Camposancos) volve a lucir este verán o distintivo de Bandeira Azul 

O alcalde do concello de A Guarda e o concelleiro de Turismo, c on dous socorristas, momentos antes de izar á Bandeira Azul na praia do Forte, en Camposancos

Fotos: C.A.G.

Infogauda / A Guarda

 Esta tempada de verán as praias do Forte e Area Grande, do concello de A Guarda recibiron o distintivo de Bandeira Azul outorgada pola ADEAC (Asociación de Educación Ambiental e do Consumidor), como recoñecemento a súa calidade medio ambiental e aos servizos que ofertan. Ademais, concedeuse a distinción Sendeiro Azul á unión das sendas que percorren a costa de A Guarda entre esas dúas praias.  

 Tras renunciar a pasada tempada ás Bandeiras Azuis que lle foran concedidas, por non dispor de socorristas aspirantes, este verán o Concello de A Guarda contará cun cadro de persoal de servizo formado por catro socorristas contratados; dous dos socorristas atenderán a praia do Forte (Camposancos) de luns a domingo, cumprindo así con este requisito para poder izar dita Bandeira Azul. No caso da praia Area Grande o servizo activarase unicamente de venres a domingo, dispoñéndose tamén nesta praia de dous socorristas durante eses días da semana. O servizo de socorrismo prestarase no período que vai dende o pasado sábado día 8 de xullo ata o 8 de setembro, en horario de 12:00 a 20:00.  

 A praia do Forte, ademais de estar adaptada para persoas con diversidade motriz con pasarela accesible e cadeira anfibia, conta con outros servizos esixidos por Bandeira Azul, como son: paneis informativos, análise de augas con resultados de “excelente” nos catro veráns anteriores, servizo de limpeza e de recollida de residuos así coma aseos. 

 A ADEAC comunicou ao Concello de A Guarda a autorización para izar a bandeira a pesar dos danos nos accesos á praia provocados polas riadas do pasado inverno. A reparación desta zona é unha prioridade dende o primeiro día para o actual equipo de goberno, quedando unicamente, tras facer de urxencia as xestións correspondentes, á espera de recibir os permisos por parte da autoridade de Costas para levar a cabo as obras necesarias de reacondicionamento. 

A Bandeira Aazul e o distintivo de Ecopraia xa ondean na praia do Forte

 

 Por último, destacar que, ademais da Bandeira Azul na praia de O Forte, izouse tamén o distintivo de Ecopraia concedido pola Asociación Técnica para a Xestión de Residuos e Medio Ambiente (ATEGRUS). Este distintivo recoñece o esforzo da limpeza manual das praias, respectando o delicado ecosistema dunar como espazo protexido Red Natura 2000 na que se encontra integrada dita praia.   

 Dende o Concello de A Guarda queren animar a todo o mundo a desfrutar das fermosas praias coas que conta o noso municipio.