ECONOMÍA

Carmela Silva lamenta as taxas de precariedade e temporalidade que se agochan detrás dos datos do paro do mes de abril 

A presidenta da Deputación ve positivo o aumento de emprego, que relaciona coa Semana Santa, pero advertiu da baixa calidade que presentan estas contratacións 

Carmela Silva, presidenta da Deputación de Pontevedra

Foto: D.P.

Infogauda / Pontevedra

 A presidenta da Deputación de Pontevedra, Carmela Silva sinalou que os datos do paro do mes de abril son unha boa noticia pero lamentou que detrás deste crecemento, que relacionou directamente coas contratacións durante a Semana Santa, se estea a confirmar unha tendencia cada vez máis acusada de creación de traballos temporais e sinalou ademais os preocupantes datos da taxa de cobertura das persoas desempregadas, que en Pontevedra non chega nin ao 50%.  

 Carmela Silva manifestou a súa satisfacción pola mellora dos datos xa que "non é cuestión de facer disto unha confrontación política" pero dixo que destras destas cifras agóchanse datos alarmantes como que o 92,2% do total do emprego que se está a crear na provincia de Pontevedra son temporais, o que implica á súa vez unha maior precariedade laboral e salarios máis baixos. Esta temporalidade, habitualmente ligada ao sector servizo, vén a supoñer tamén unha diminución dos dereitos laborais das e dos traballadores. Así mesmo, o crecemento do mes de abril é na súa gran maioría de tipo estacional, principalmente ligado ao sector servizos e ao incremento que sempre se pode celebrar durante a Semana Santa.  

 Por outro lado, Silva dixo "sentirse especialmente preocupada pola taxa de cobertura das persoas desempregadas, que a nivel estatal é dun 54,9%, e que en Pontevedra nin acada á metade da poboación desempregada cun 49,1%,  o que evidencia "que hai moita xente sen traballo que se atopa sen ningún tipo de prestación", unha situación que urxiu a resolver o antes posible, xa que estas familias que non contan con ningún tipo de subsidio polo que poden estar a vivir na pobreza ou en risco de estalo proximamente de non tomar medidas ao respecto.