O persoal da automoción galega insiste en esixir medidas urxentes ante despidos e ERTE
• A CIG-Industria desenvolveu hoxe unha manifestación en Vigo cando se cumpre un ano da histórica folga en defensa do emprego no sector
Infogauda / Vigo
Os cadros de persoal da automoción galega seguen a reclamar medidas urxentes ante a vaga de despidos e de ERTE nun sector que hai xusto hoxe un ano fixo unha demostración de unidade, forza e dignidade participando na histórica folga convocada pola CIG-Industria en defensa do emprego e dunhas condicións laborais dignas. Coincidindo con este aniversario, a central sindical celebrou unha manifestación esta mañá no Camiño do Caramuxo para demandar actuación inmediatas ante a grave crise que atravesa unha industria fundamental para as comarcas viguesa, pontevedresa e ourensá e estratéxica para o conxunto do país.
Na marcha que arrincou pasadas as 11:00 horas dende as instalacións de Akwel, empresa que vén de aplicar un ERE extintivo para 89 persoas, participaron persoas traballadoras e delegadas sindicais das principais compañías do sector de Vigo, Pontevedra e Ourense, ademais do propio secretario xeral da CIG, Paulo Carril.
Dende a central insisten en que as reivindicacións que motivaron a folga de hai un ano seguen na actualidade aínda máis vixentes, xa que a precarización laboral avanza e as paradas na produción sucédense sen que nin a Xunta nin o Goberno español adopten solucións efectivas. “Un ano despois da primeira folga na historia do sector, tanto en Galiza como no conxunto do Estado, todo o que alertabamos que ían acontecer no caso de non atender as nosas reivindicacións confirmouse, até o punto de que en 12 meses a industria do automóbil galega perdeu o 5% dos empregos: 1400 compañeiros/as foron ao paro na situación de carestía da vida que sufrimos”, denuncian.
E sosteñen que a crise que atravesa a automoción en Galiza é consecuencia directa dun proceso de electrificación do sector que non conta cun Plan propio para o noso país por parte do Ministerio de Industria nin da Consellaría de Industria, “mais tamén do estúpido enfrontamento da UE cos fabricantes chineses do automóbil, obedecendo ordes do goberno de Estados Unidos”.
Unha situación que contrasta cos datos económicos das empresas: a propia Stellantis España obtivo uns beneficios de 718,9 millóns de euros en 2024, mentres aplica unha política de externalización da fabricación de compoñentes cara a Marrocos que está a levar ao peche as empresas galegas. De feito, nos últimos meses rexistráronse despidos tanto en Akwel como no propio Centro Tecnolóxico da Automoción de Galiza (CTAG).
Neste contexto, o pasado mes de marzo a Consellería de Industria, a patronal galega e CCOO e UGT asinaron o Plan Director da Automoción no que acordan “regalarlle” ás compañías 185 millóns de euros “a cambio de nada”. O Plan só tivo o voto en contra da CIG porque non incluía o compromiso de mantemento do emprego.
“E agora atopámonos ante unha nova crise de microchips -outra escusa para tapar a súa incapacidade- que trae novas paradas na produción e novos ERTE, esta vez polo elevado stock de vehículos, que se venden a prezos inalcanzables pola avidez dos consellos de administración en repartir uns dividendos que xamais se repartiran”. De feito, Stellantis España repartiu 704 millóns de dividendos en 2024, mentres a nómina das 12.391 persoas traballadoras da empresa foi de 593,6 millóns de euros ese ano.
Principais demandas da CIG para a automoción galega
• Un Plan Industrial para a Automoción galega vencellado ao novo PERTE VEC IV.
• Axudas públicas vinculadas a creación, estabilidade e mantemento do emprego en Galiza.
• Fin dos ERTE abusivos e da precarización do sector.
• Garantir proxectos de futuro como a instalación dunha fábrica de baterías.
• Investimento público e garantías para a instalación dun novo fabricante de vehículos na PLISAN.
Ningún comentario:
Publicar un comentario