TOMIÑO

SOCIALISTAS DE TOMIÑO ABORDAN A VIOLENCIA MACHISTA NO RURAL

Agrupación do PSdeG-PSOE / Tomiño

 Na tarde do 26 de novembro tivo lugar a charla coloquio para conmemorar o 25N que tivo como eixo a violencia de xénero no rural.

 Organizado polo PSdeG-PSOE de Tomiño, o acto contou con Rosa Arcos Caamaño, ex presidenta de Fademur Galicia e na actualidade secretaria xeral e directora de proxectos desa entidade, referente da loita feminista galega pola igualdade real e efectiva e militante do activismo social e do asociacionismo.

 Deu a benvida as persoas asistentes a secretaria xeral da Agrupación Socialista que lembrou a necesidade de alzar a voz mais que nunca contra as violencias machistas ante os discursos negacionistas que poñen en risco a vida das mulleres e alertou do perigo dos recortes en políticas de igualdade, como o levado a cabo pola Deputación de Pontevedra que acarrexarán a merma de recursos, especialmente nos núcleos rurais. 

 A secretaria da Comisión Executiva Municipal, Nandi de Santiago, presentou e moderou a charla, facendo un percorrido polo extenso currículo de Rosa Arcos Caamaño e incidiu en como o territorio inflúe no xeito no que se percibe, se vive e se enfronta a violencia machista, e é urxente que as Administracións poñan a disposición das persoas que habitan nos núcleos máis pequenos, medios e ferramentas que permitan ás vítimas sair e deixar atrás esas situacions de violencia. 

 Así o corroborou Rosa Arcos, que debullou os datos e as cifras que arroxa a Actualización da Enquisa sobre a percepción de violencia de xénero no rural. Os resultados son moi claros:

• As mulleres do rural galego síntense desprotexidas fronte a violencia machista.

• Menos dun terzo dos concellos de Galicia dispoñen dun Centro de Información á Muller (CIM).

• Máis do 47% das vítimas de violencia machista leva nesa situación máis de 10 años,

• O 62’5% dos asasinatos machistas producidos en Galicia dende 2020 sucederon en municipios de menos de 20.000 habitantes.

 A relatora respostou tamén preguntas e aclarou dúbidas das persoas asistentes que remataron conversando e tomando un viño galego, emprazando a Rosa Arcos a voltar pois soubo a moi pouco.