GONDOMAR

A Xunta realiza labores de conservación fluvial en 5 km dos ríos Miñor e Zamáns, no Concello de Gondomar 

• As tarefas que realiza Augas de Galicia prolongaranse durante arredor de 11 semanas e inclúen a retirada tanto de árbores caídas como de biomasa das canles fluviais para evitar atoamentos 

A Consellería de Medio Ambiente e Cambio Climático, a través de Augas de Galicia, está a executar distintas actuacións de conservación e mantemento fluvial 

Foto: X.G.

Infogauda / Gondomar

 A Consellería de Medio Ambiente e Cambio Climático, a través de Augas de Galicia, está a executar distintas actuacións de conservación e mantemento fluvial en preto de 5 quilómetros de dous ríos no concello pontevedrés de Gondomar.  

 As tarefas, que xa foron comunicadas ao concello e que se prolongarán durante arredor de 11 semanas, desenvolveranse en máis de 4,3 quilómetros do río Miñor, ao seu paso polas parroquias de Santa María de Chaín, San Miguel de Peitieiros, San Pedro da Ramallosa, San Bieito de Gondomar, San Vicente de Mañufe e Santa Baia de Donas. A maiores, tamén se actuará en 621 metros do río Zamáns, na parroquia de Santa María de Vincios.  

 Os traballos consisten na retirada de árbores caídas e biomasa presente na canle fluvial para evitar atoamentos, así como na eliminación de especies exóticas invasoras. Realizaranse coa aplicación de motoserras, rozadoiras, podadoiras e outras ferramentas manuais. Ademais, o persoal contará co apoio de maquinaria de maiores dimensións como un tractor, un camión e unha carretilla de carga.  

 Unha vez finalizadas as obras programadas polo organismo hidráulico dependente do Executivo galego, estes tramos fluviais quedarán despexados de maleza, posibilitando así a circulación fluída das augas.  

 Augas de Galicia desenvolve estas accións no marco do programa de mantemento, conservación e mellora do dominio público hidráulico das bacías de Galicia-Costa e nas zonas de acceso e protección.  

 O fin último dos traballos é mellorar os leitos fluviais para favorecer as condicións naturais do ecosistema dos ríos, actuando nas áreas nas que a Xunta ten competencias, fóra das tramas urbanas fluviais de responsabilidade municipal.