GALIZA

A CIG-Saúde advírtelle á Consellaría que se non reforza a Atención Primaria enfrontarase a máis folgas e mobilizacións  

• A terceira xornada de paro que tivo lugar onte rexistrou de novo un importante seguimento e numerosas protestas nos centros de saúde 

A CIG-Saúde valorou moi positivamente a resposta do persoal durante as tres xornadas de folga convocadas na Atención Primaria

Foto: CIG

Infogauda / Galiza

 A CIG-Saúde valorou moi positivamente a resposta do persoal durante as tres xornadas de folga convocadas na Atención Primaria para reclamar un “cambio de rumbo” na xestión do Sergas tras anos de falta de planificación e de recortes, ao tempo que lle advertiu á Consellaría de Sanidade que se enfrontará a máis paros e mobilizacións se na reunión da Mesa Sectorial convocada para o venres 5 insiste en non achegar propostas que permitan solucionar a crise que atravesa esta servizo. 

 Coincidindo co terceiro e último día de folga, que volveu rexistrar un importante seguimento sobre todo entre o persoal de medicina de familia, numerosos centros de saúde de todo o país acolleron concentracións para esixir melloras nas condicións de traballo, a negociación e aplicación inmediata do plan de ordenación dos recursos humanos e unha aposta política decidida en defensa da Atención Primaria, como ámbito fundamental da sanidade pública. 

 Boa proba do éxito da convocatoria -a pesar dos servizos mínimos “de máximos” impostos pola Administración- é o feito de que a Consellaría teime en manipular os datos, facilitando cifras de participación sen discriminar o persoal que non pode facer folga e mesmo incluír no cálculo de porcentaxes as persoas traballadoras en ausencia xustificada. Polo que instan o conselleiro a “tomar nota” e a asumir a súa responsabilidade na busca de solucións para as problemáticas da Atención Primaria.  

 Dende a CIG-Saúde insisten na necesidade de apostar por un modelo que dispoña co persoal necesario, estea distribuído por todo o territorio e conte con especialistas de pediatría en cada un dos centros de saúde. Para isto, a representación da central sindical acudirá á Mesa Sectorial convocada para o venres 5 de decembro -da que non hai orde do día nin se trasladou ningún documento para negociar- cunha reivindicación fundamental: analizar a situación real de todas as categorías profesionais e “crear un escenario en positivo para o futuro da Atención Primaria”. Para o que é preciso que se dote as categorías deficitarias de máis profesionais pero tamén que se melloren as condición de traballo “porque senón non conseguiremos incorporar novos/as profesionais e estaremos agravando o problema”.